7 ნოემბერს, ინფორმაციის თავისუფლების განვითრების ინსტიტუტის წარმომადგენლები (ლევან ავალიშვილი და გიორგი კლდიაშვილი) დაბა ხარაგაულში ადგილობრივი არასამთავრობო ორგანზიაციების (ორგანიზაცია „ცენტრი“) და მედია საშუალებების (გაზეთი „ჩემი ხარაგაული“) მიწვევით სპეციალურად ამ შეხვედრისთვის შეკრებილ საზოგადოებას ესაუბრნენ საქართველოში საჯარო ინფორმაციის ხელმისაწვდომობასთან დაკავშირებული საკითხებისა და ინსტიტუტის პროექტ „საჯარო ინფორმაციის მონაცამთა ბაზის -www.opendata.ge“-ს შესახებ.

IDFI-ის გამგეობის თავმჯდომარემ და პროექტ „საჯარო ინფორმაციის მონაცამთა ბაზის -www.opendata.ge“ -ს დირექტორმა ლევან ავალიშვილმა დამსწრე საზოგადოებას გააცნო პროექტის ფარგლებში დაბა ხარაგაულის გამგეობიდან ინსტიტუტის მიერ საჯარო ინფორმაციის მოთხოვნის წერილზე მიღებული პასუხის დეტალები.

  დისკუსიაზე მოწვეულ სტუმრებს შორის იყვნენ დაბა ხარაგაულის   საკრებულოს წევრები, სხვადასხვა პოლიტიკური პარტიის, მედია და სამოქალაქო საზოგადოების ორგანიზაციის  და სხვა დაინტერესებული საზოგადოების წარმომადგენლები.

  შეხვედრის დროს ძირითადი ყურადღება დაეთმო დაბა ხარაგაულში ადგილობრივი ხელისუფლების მხრიდან საჯარო ინფორმაციის ხელმისაწვდომობასთან დაკავშირებული პრობლემების განხილვას, ინფორმაციის მოთხოვნისა და საჯარო ინფორმაციის გაცემის საკითხებზე მსჯელობას.

არასამთავრობო ორგანიზაციისა და  საკრებულოს წარმომადგენლებმა ასევე ისაუბრეს იმ კონკრეტულ საკითხებზე, და საზოგადოებას გააცნეს ის შემთხვევები, რომლებიც მათი სამუშაო პრაქტიკიდან გამომდინარე, ასახავდა საჯარო ინფორმაციის მიღებასთან დაკავშირებულ პრობლემებს. აღინიშნა, რომ დაბა ხარაგაულის გამგეობიდან განსაკუთრებით გართულებულია საჯარო ინფორმაციის მიღება ადმინისტრაციული ხარჯების თაობაზე.

IDFI-ის წარმომადგენლებმა დაბა ხარაგაულის საზოგადოების წარმომადგენლებს აღუთქვეს დახმარება საჯარო ინფორმაციის მიღებასთან დაკავშირებით, დაისახა საერთო სტრატეგია და კონკრეტული ნაბიჯები და ღონისძიებები ამ მიმართულებით და ასევე, ერთობლივი საქმიანობა.

IDFI უახლოეს მომავალში გეგმავს დაბა ხარაგაულის საზოგადოების წარმომადგენლებთან კიდევ რამდენიმე შეხვედრას.

ინფორმაციის თავისუფლების განვითარების ინსტიტუტი აპირებს მსგავს შეხვედრებს მისცეს პერმანეტული ხასიათი და ინფორმაციის თავისუფლების საკითხებზე მსჯელობა-დისკუსია, ისევე როგორც საჯარო ინფორმაციის ხელმისაწვდომობის შესწავლა-ანალიზი ადგილზე, საზოგადოების წარმომადგენლებთან შეხვედრების სახით საქართველოს სხვა რეგიონებშიც განახორციელოს.