სამშაბათს, 2 სექტემბერს, შედგა შეხვედრა IDFI-სა და ფინური კომპანია Timi TVConsulting-ის დამფუძნებელს, EBRD-ის წარმომადგენელ ტაუნო აიალას შორის. შეხვედრის მიზანი ციფრულ მაუწყებლობაზე გადასვლის პროცესთან დაკავშირებით რეკომენდაციებისა და ფინური გამოცდილების გაზიარება იყო.
შეხვედრის ფარგლებში განიხილებოდა ციფრულ მაუწყებლობაზე გადასვლის მოსამზადებელ პერიოდში ჩატარებული ტექნიკური თუ სამართლებრივი სამუშაოები, ეროვნული ციფრული მიწისზედა სატელევიზიო ქსელების დანერგვის ტექნოლოგიური სტანდარტები, რეგიონულ მაუწყებლებთან, მთიან რეგიონებთან და სეთ-თოფ-ბოქსების დისტრიბუციასთან დაკავშირებული პრობლემები.
მხარეებმა ისაუბრეს საქართველოში ციფრულ მაუწყებლობაზე გადასვლის სწორი ინფორმაციული კამპანიის დაგეგმვისა და წარმოების, მომხმარებელთა ინფორმირების მიზნით ქოლ-ცენტრებისა და სხვა შესაბამისი მომსახურებების დანერგვის შესაძლებლობებზე. განხილვის ერთ-ერთი მნიშვნელოვანი თემა გახლდათ საქართველოს მთავრობის წინაშე არსებული გამოწვევა - სოციალურად დაუცველი მოსახლეობის სეთ-თოფ-ბოქსებით უზრუნველყოფის პროცესის სტრუქტურიზება.
IDFI-სა და EBRD-ის წარმომადგენლები აქტიურ თანამშრომლობასა და სამომავლო საკონსულტაციო შეხვედრებზე შეთანხმდნენ.
სიახლეების გამოწერა
