RSF-მა (Reporters Without Borders) 2024 წლის პრესის თავისუფლების ინდექსი გამოაქვეყნა. პრესის თავისუფლების ინდექსი, 2002 წლიდან აფასებს მედიის თავისუფლებას მსოფლიოს 177 ქვეყანაში. RSF-ი საქართველოს აფასებს 2003 წლიდან. 

2024 წელს საქართველოს რეიტინგი 26 ადგილით გაუარესდა და 177 ქვეყანას შორის 103-ე ადგილი დაიკავა. 

თუ არ ჩავთვლით 2008 წელს, საქართველო მსოფლიო რეიტინგის ასეულს მიღმა მხოლოდ 2011-2012 წლებში იმყოფებოდა. 2013 წლიდან დაიწყო ნეგატიური დინამიკის სწრაფი გაუმჯობესება, თუმცა 2021 წლის შემდგომ ვითარების მკვეთრი გაუარესების შედეგად, ქვეყნის რეიტინგი 2011-2012 წლების ნიშნულს დაუბრუნდა. 

აღსანიშნავია, რომ რეიტინგის ასეულს მიღმა არ იმყოფება ევროკავშირის არცერთი წევრი სახელმწიფო, მეტიც, ევროპის კონტინენტის არცერთი ქვეყანა გარდა ბელარუსისა. პრესის თავისუფლების ინდექსში უკრაინა იკავებს მე-60, ხოლო მოლდოვა 31-ე ადგილს. საქართველოს 36 ადგილით უსწრებს უნგრეთიც. 

ნიშანდობლივია, რომ 2024 წელს საქართველო იმ ქვეყნების ათეულშია, სადაც მედიის მდგომარეობა, 2023 წელთან შედარებით, ყველაზე მეტად გაუარესდა. საქართველოსთან ერთად ამ ათეულშია ავღანეთი (რეიტინგი 178), არგენტინა (რეიტინგი 66), ბურკინა-ფასო (რეიტინგი 86) და ეკვადორი (რეიტინგი 110). 

2022-2024 წლების განმავლობაში საქართველოში დემოკრატიის ხარისხმა მკვეთრი უკუსვლა განიცადა. არსებითად დამძიმდა მედიისა და ჟურნალისტების უფლებრივი მდგომარეობა. რუსული კანონიდან მომდინარე ორგანიზაციულად არსებობის საფრთხეს, ჟურნალისტებსა და ოპერატორებზე სასტიკი ფიზიკური ძალადობა დაემატა. გამოხატვისა თავისუფლება დიქტატურისკენ მიმავალი რეჟიმების პრიორიტეტული სამიზნეა.