2021 წლის 5 მარტს, ნიდერლანდების სამეფოს საელჩოს მხარდაჭერით, ინფორმაციის თავისუფლების განვითარების ინსტიტუტისა (IDFI) და სახელმწიფო ინსპექტორის სამსახურის ერთობლივი პროექტის „პერსონალური მონაცემების დაცვის მხარდაჭერა საქართველოში“ გახსნითი ღონისძიება გაიმართა.

პროექტის მთავარი მიზანია ხელი შეუწყოს ყველაზე პრობლემურ სფეროებში პერსონალური მონაცემების დაცვის გაძლიერებას. ამ მიზნის მისაღწევად IDFI,სახელმწიფო ინსპექტორის სამსახურთან თანამშრომლობით, იმუშავებს პერსონალური მონაცემების დაცვის სტანდარტებთან დაკავშირებით ცნობიერების ამაღლების მიმართულებით, წაახალისებს არსებული გამოწვევების შესახებ პროფესიულ და აკადემიურ დისკუსიებს, ასევე ხელს შეუწყობს სახელმწიფო ინსპექტორის სამსახურის შესაძლებლობების გაძლიერებას.

ღონისძიება IDFI-ის აღმასრულებელმა დირექტორმა, გიორგი კლდიაშვილმა, სახელმწიფო ინსპექტორმა, ლონდა თოლორაიამ და საქართველოში ნიდერლანდების სამეფოს ელჩმა, მააიკე ვან კოლდამმა გახსნეს. IDFI-ის კანონის უზენაესობისა და ადამიანის უფლებების მიმართულების ხელმძღვანელმა, ქეთევან კუკავამ ღონისძიების მონაწილეებს პროექტის ძირითადი მიზნები და დაგეგმილი აქტივობები გააცნო.

პროექტის ფარგლებში განხორციელდება ცნობიერების ამაღლების აქტივობები, მომზადდება პუბლიკაციები, დაიგეგმება სამუშაო შეხვედრები შესაბამის სამიზნე ჯგუფებთან, სახელმწიფო ინსპექტორის სამსახურის პერსონალისათვის ჩატარდება ტრენინგები, ასევე, დაიგეგმება აქტივობები სტუდენტებისთვის. პროექტის აქტივობების განხორციელების შედეგად, გაძლიერდება სახელმწიფო ინსპექტორის სამსახურის შესაძლებლობები, რაც ხელს შეუწყობს საქართველოში პერსონალური მონაცემების დაცვის უზრუნველყოფას.

ონლაინ ფორმატში პროექტის დაწყებას სამოქალაქო სექტორის, საერთაშორისო ორგანიზაციების, დიპლომატიური კორპუსის წარმომადგენლები და სხვა დაინტერესებული პირები ესწრებოდნენ.

ახალი ინიციატივა საჯარო, არასამთავრობო სექტორისა და დიპლომატიურ კორპუსის ერთობლივი თანამშრომლობის წარმატებულ მაგალითს წარმოადგენს. პროექტის ფარგლებში დაგეგმილი ღონისძიებები ხელს შეუწყობს ქვეყანაში პერსონალურ მონაცემთა დაცვის სტანდარტის ამაღლებასა და მიზნობრივი ჯგუფების ინფორმირებულობის გაზრდას.