20 იანვარს IDFI-მ ჩაატარა ტრენინგი ხელისუფლების საქმიანობის მონიტორინგის მექანიზმების შესახებ. ღონისძიებას ესწრებოდნენ IDFI-ს კორუფციასთან ბრძოლის სასერტიფიკატო კურსის მონაწილეები, რომელთა შორის არიან სტუდენტები, სამოქალაქო საზოგადოებისა და საჯარო დაწესებულებების წარმომადგენლები. 

ტრენინგის სესიებს უძვებოდნენ IDFI-ის ადგილობრივი მმართველობის, ინტერნეტისა და ინოვაციების მიმართულებების ხელმძღვანელი, თეონა ტურაშვილი, და კვლევითი მიმართულების ხელმძღვანელი, გოგა თუშურაშვილი.

ტრენინგის მონაწილეებმა მიიღეს როგორც პრაქტიკული, ისე თეორიული ცოდნა მონიტორინგისა და მონაცემების ანალიზის ისეთი მექანიზმების ირგვლივ, როგორებიცაა:

- როგორ მოვიძიოთ სასურველი საჯარო მონაცემები სხვადასხვა ოფიციალური და სამოქალაქო პორტალებიდან და ვებგვერდებიდან? 

- როგორ დავამუშავოთ, გავაანალიზოთ და ერთმანეთთან დავაკავშიროთ მონაცემები?

- როგორ დავაკვირდეთ ადგილობრივი ხელისუფლების მიერ ბიუჯეტის განკარგვას და მის ფინანსურ საქმიანობას;

- ბენეფიციარ მესაკუთრეთა გამჭვირვალობის სტანდარტები;

- კომპანიების ბენეფიციარი მესაკუთრეების დასადგენად საჭირო ონლაინ რესურსები და კვლევის მეთოდები; 

- მონაცემების ვიზუალურად გამოსახვის თავისებურებები.

გარდა ამისა, მონაწილეებს ბენეფიციარი მესაკუთრეების შესახებ მონაცემების მოპოვების გზებზე, მონაცემების ანალიზისა და ვიზუალურად გამოსახვის გამოცდილება ონლაინ ჩართვით გაუაზიარა მიხალ სკოპმა, ჩეხეთსა და სლოვაკეთში მოღვაწე არასამთავრობო ორგნაიზაციის KohoVolit.eu-ის აღმასრულებელმა დირექტორმა. 

ღონისძიება ინტერაქტიულ რეჟიმში წარიმართა და მოიცავდა თეორიისა და პრაქტიკის ნაზავს. მონაწილეებმა იმუშავეს პრაქტიკულ შემთხვევებზე და გამართეს შესაბამისი დისკუსიები.

ღონისძიება გაიმართა პროექტის - ხელისუფლების ანგარიშვალდებულებისთვის სამოქალაქო საზოგადოების გაძლიერება და გამჭვირვალობის სტანდარტების გაზრდა - ფარგლებში. პროექტი დაფინანსებულია  ვიშეგრადის საერთაშორისო ფონდისა და კორეის რესპუბლიკის საგარეო საქმეთა სამინისტროს მიერ.