2023 წლის 16 მაისს, ინფორმაციის თავისუფლების განვითარების ინსტიტუტმა (IDFI) და ილიას სახელმწიფო უნივერსიტეტთან პარტნიორობით, წიგნის სახლ ”ლიგამუსში” ციფრული უფლებებისა და წიგნიერების შესახებ ტრენინგი გამართა.

ღონისძიების დასაწყისში IDFI-ის ინტერნეტისა და ინოვაციების მიმართულების ხელმძღვანელმა, თეონა ტურაშვილმა მონაწილეებს ელექტრონული მმართველობისა და ინოვაციების მიმართულებით ორგანიზაციის საქმიანობის შესახებ გააცნო. ტრენინგი დაეთმო ციფრული უფლებებისა და ციფრული წიგნიერების მნიშვნელოვან საკითხებს. კერძოდ, ტრენინგის პირველ ნაწილში სტუდენტები ციფრული უფლებების არსსა და საქართველოს კანონმდებლობის თავისებურებებს გაეცნენ. ასევე, პირველი სესია მოიცავდა იმ მთავარ ციფრულ გამოწვევებს, რაც საქართველოს შემთხვევაში საერთაშორისო თუ ადგილობრივი კვლევების თანახმად იკვეთება. მონაწილეები ასევე გაეცნენ IDFI-ის ბოლო კვლევებსა და რეკომენდაციებს ციფრული უფლებების დაცვის საკანონმდებლო გარანტიების გაუმჯობესების თვალსაზრისით. 

ტრენინგის მეორე ნაწილს უძღვებოდა IDFI-ის ანალიტიკოსი, გვანცა ნიკურაძე, რომელმაც ტრენინგის მონაწილეებს გააცნო საჭირო რჩევები სხვადასხვა ციფრული პლატფორმის, სოციალური ქსელებისა და ელექტორნული მოწყობილობების უსაფრთხოდ გამოსაყენებლად. 

ტრენინგი ინტერაქციულ ფორმატში ჩატარდა, რამაც მონაწილეებს მისცა საშუალება გაეზიარებინათ საკუთარი მოსაზრებები და გამოცდილებები, დაესვათ შეკითხვები და გაეღრმავებინათ პრაქტიკული თუ თეორიული ცოდნა ციფრული უსაფრთხოების საკითხებში.