3 ივლისის აქციის ორგანიზატორებისა და მხარდამჭერ პირების საინფორმაციო შეხვედრებზე თავდასხმები აშკარად ატარებს კოორდინირებულ ხასიათს და შეიცავს სისხლის სამართლის კოდექსით გათვალისწინებული დანაშაულის ნიშნებს.

2022 წლის 3 ივლისს დაგეგმილია მშვიდობიანი აქცია, რომლის მიზანია საქართველოსთვის ევროკავშირის კანდიდატის სტატუსის მინიჭების ხელშეწყობა. უკანასკნელი ორი დღის განმავლობაში რამდენჯერმე გავრცელდა ცნობები აქციის ორგანიზატორებისა და მხარდამჭერ პირებზე/ოპოზიციური პარტიების წარმომადგენლებზე განხორციელებული ძალადობისა და ხელშეშლის თაობაზე, კერძოდ:

- 2022 წლის 30 ივნისი: “შინ ევროპისკენ” კამპანიას დაუპირისპირდნენ ბათუმში იხ. ბმული

- 2022 წლის 30 ივნისი: სამტრედიაში “შინ ევროპისკენ” კამპანიის მსვლელობისას თავს დაესხნენ გიგი გიგიაძეს იხ. ბმული

- 2022 წლის 30 ივნისი: “შინ ევროპისკენ” კამპანიის ჩატარებას ხელი შეუშალეს თელავში იხ. Ბმული

- 2022 წლის 30 ივნისი: ძალადობა ივანე ჯავახიშვილის სახელობის თბილისის სახელმწიფო უნივერსიტეტის ე.წ. მაღლივის კორპუსის მიმდებარე ტერიტორიაზე იხ. ბმული.

- 2022 წლის 30 ივნისი: “შინ ევროპისკენ” კამპანიის წევრებს ორგანიზებულად დაუპირისპირდნენ ხონში და ხელი შეუშალეს მოსახლეობასთან შეხვედრას იხ. Ბმული

- 2022 წლის 29 ივნისი: ქუთაისში “შინ ევროპისკენ” კამპანიის წევრებს: გიორგი ჯანელიძეს და გიგი გიგიაძეს ორგანიზებული თავდასხმის გზით ხელი შეუშალეს მოსახლეობასთან კომუნიკაციაში  იხ. ბმული

- 2022 წლის 29 ივნისი: თავდასხმა ბადრი ჯაფარიძეზე ყვარელში იხ. Ბმული

- 2022 წლის 29 ივნისი: თავდასხმა ნაციონალური მოძრაობის წარმომადგენლებზე გურიაში იხ. ბმული

გავრცელებული ცნობების თანახმად, ხელშეშლის ჩამოთვლილ ინციდენტებში, რიგ შემთხვევებში მონაწილეობდნენ, მმართველი პარტიის წარმოამდგენლები, მათ შორის საჯარო მოხელეები.  მთლიანობაში ჩანს, რომ ძალადობის და ხელშეშლის აღწერილ ფაქტები არის არა შემთხვევითი, არამედ ატარებს ორგანიზებულ ხასიათს.

აღწერილი ქმედებები, შეიცავს სისხლის სამართლის კოდექსის 153-ე და 161-ე მუხლებით გათვალისწინებულ დანაშაულების ნიშნებს, რაც სიტყვის თავისუფლების ან/და ინფორმაციის მიღების ან გავრცელების უფლების განხორციელებისათვის უკანონოდ ხელის შეშლას და შეკრებისა და მინფესტაციების უფლების ხელყოფას  გულისხმობს.

მოვუწოდებთ შინაგან საქმეთა სამინისტროს უზრუნველყოს 3 ივლისის აქციის ორგანიზატორებისა და მხარდამჭერთა საზოგადოებრივი კამპანიების მშვიდობიანი წარმართვა. სამინისტრომ უნდა განახორციელოს, კანონით გათვალისწინებული პრევენციული და შემდგომი რეაგირების ღონისძიებები რათა არ დაუშვას 3 ივლისის აქციის ფონის დამძიემბა და ძალადობის წახალისება.

მოვუწოდებთ სპეციალურ საგამოძიებო სამსახურს დაუყოვნებლივ დაიწყოს გამოძიება სისხლის სამართლის კოდექსის 153-ე მუხლით გათვალისწინებულ დანაშაულზე.