2 დეკემბერს, გამთენიისას, სპეცრაზმის მიერ რუსთაველის გამზირზე მიმდინარე შეკრების დარბევისას საპოლიციო ძალებმა ალყაში მოაქციეს მშვიდობიანი დემონსტრანტები და დააკავეს ათობით პირი.  დაკავებულთა შორის არის, IDFI-ის კანონის უზენაესობისა და მედიის თავისუფლების მიმართულების ხელმძღვანელი, ადვოკატი, გიორგი დავითური. 

გიორგი დავითური, დაახლოებით 11:00 საათისკენ, თბილისში, დროებითი მოთავსების ერთ-ერთ იზოლატორში გადაიყვანეს. 12 საათისთვის ადვოკატს მასთან შეხვედრის შესაძლებლობა მიეცა. გიორგი დავითურს სახის არეში აღენიშნება დაზიანებები, ასევე ორივე მაჯაზე  ხელბორკილების ნაჭდევები. დაკავებისას მას ასევე აყენებდნენ სიტყვიერ შეურაცხყოფას. 

დაკავების უსაფუძვლობის მიუხედავად, მას არ გაუწევია საპოლიციო ძალებისთვის  წინააღმდეგობა არცერთ ეტაპზე, ის მშვიდობიანი ფორმით მონაწილეობდა შეკრებაში. 

ხაზგასასმელია, რომ გიორგი დავითურისთვის არ განუმარტავთ მისი დაკავების საფუძველი. აღნიშნული ინფორმაცია მისთვის ადვოკატთან შეხვედრის დროსაც არ იყო ცნობილი.

გიორგი დავითურის მხრიდან სამართალდარღვევის ჩადენის ფაქტს ადგილი არ ჰქონია, მან უარი განაცხადა ადმინისტრაციული სამართალდარღვევის შესახებ ოქმის ხელმოწერაზე. 

ბოლო დღეებში, საპოლიციო ძალების მხრიდან მშვიდობიანი დემონსტრანტების მიმართ განხორციელებული სისტემური ძალადობა, მედიის მიმართ სასტიკი მოპყრობა და მათ პროფესიულ საქმიანობაში უკანონო ხელშეშლა, შეკრების უკანონოდ დარბევისას დემონსტრანტების ალყაში მოქცევა კიდევ ერთხელ ავლენს რეპრესიაზე დაფუძნებული რეჟიმის ძალადობრივ სახეს.

საქართველოს კონსტიტუციისა და ევროპული მომავლის დაცვისთვის დაკავებული ყველა პირი დაუყოვნებლივ უნდა გათავისუფლდეს!