IDFI-ს განცხადება Россия сегодня-ს პროექტთან დაკავშირებით

სიახლეები | განცხადებები 13 ნოემბერი 2014

12 ნოემბერს რუსულმა გამოცემა „რია-ნოვოსტიმ“ გაავრცელა ინფორმაცია, რომლის თანახმად, საქართველოში მაუწყებლობა დაიწყო "როსია სეგოდნიას" ["Россия сегодня"] საინფორმაციო-ანალიტიკურმა რადიოსადგურმა Sputnik-მა. გამოცემის ინფორმაციით, გადაცემები ქართულენოვანი იქნება, საწყის ეტაპზე ოთხი საათი გავა ეთერში, თუმცა, მომავალში 24 საათიანი მაუწყებლობის განხორციელება იგეგმება.

 

Sputnik-ი თბილისის სამაუწყებლო ზონაში FM 101.4 სიხშირეზე გადაიცემა. ამ სიხშირის მფლობელი შპს „რ-რადიოა“, რომელიც ეთერში „რადიო მონტე კარლოს“ სახელით ვრცელდებოდა.


თავად „რადიო მონტე კარლოს“ ვებგვერდზე განთავსებული ინფორმაციის თანახმად, შპს „რ–რადიო“ საქართველოს კომუნიკაციების ეროვნული კომისიის ლიცენზიატია. იგი ფლობს სამაუწყებლო ლიცენზიას, ნომრით B104 (ძველი ნომერი: 562). ლიცენზიის სახე: კერძო რადიომაუწყებლობა. ლიცენზიის სახეობა: საერთო მაუწყებლობა, რომელიც საინფორმაციო გადაცემების გავრცელების ვალდებულებას მოიცავს.


შპს „რ-რადიოს“ დირექტორი ქეთევან კერესელიძეა. აღსანიშნავია, რომ ქეთევან კერესელიძე 2012 წელს „ნაციონალური მოძრაობის“ შემომწირველებში ფიგურირებს, ის პარტიას 30 ათასი ლარით დაეხმარა. „რ-რადიოს“ 61.5%-ს შპს „საზოგადოება მედია ინვესტ“ ფლობს. 38.5% კი შპს „ხიტ ეფ ემ“-ის საკუთრებაშია. თავის მხრივ „ხიტ ეფ ემ“-ის მფლობელი ნოდარ დარსაველიძეა, „საზოგადოება მედია ინვესტი“ კი ვახტანგ მგელაძის საკუთრებაშია. მასვე ეკუთვნის კომპანიები შპს „ჯენერალ პრომოუშენი“, შპს „მედია პროდაქშენს“, შპს „გლობალ მედია“ და შპს „პრესის სახლი“.


შპს „რ-რადიოს“ საკუთარ ვებ-გვერდზე გამოქვეყნებული აქვს პროგრამული ბადე, რომლის მიხედვითაც, საინფორმაციო გამოშვება ყოველ ხუთ წუთში ერთხელ გადის. რია ნოვოსტისთან საუბარში რადიოსადგურის რედაქტორი ანტონ ლასხიშვილი ირწმუნება, რომ კონტენტი ქართულ ენაზე გადაიცემა და ის პროპაგანდისტული არ იქნება. 2014 წლის 13 ნოემბრის მდგომარეობით (რადიო მონიტორინგის პერიოდი 14-17 საათები), FM 101.4 სიხშირეზე „მონტე კარლოს“ სახელით რუსულენოვანი პროგრამა გადაიცემა.


საქართველოს კომუნიკაციების ეროვნული კომისიის 2012 წლის 18 მაისის N369/6 გადაწყვეტილებით, რადიოკომპანიას ლიცენზიის ვადა 2022 წლამდე გაუგრძელა.

სალიცენზიო პირობების განსაზღვრისას, გადაწყვეტილებაში მიეთითა, რომ შპს „რ-რადიო“ ვალდებულია: „მიიღოს ყველა ზომა პროგრამებში მოყვანილი ფაქტების ჯეროვანი სიზუსტის უზრუნველსაყოფად და დროულად შეასწოროს შეცდომები. უზრუნველყოს ფაქტების ზუსტი და სამართლიანი გაშუქება, ფაქტისა და აზრის მკაფიო გამიჯვნა და აზრის ავტორის იდენტიფიცირება, დაიცვას” მაუწყებლობის შესახებ” საქართველოს კანონით განსაზღვრული სხვა შინაარსობრივი ვალდებულებები.“


"მაუწყებლობის შესახებ" საქართველოს კანონის შესაბამისად, (მუხლი 52. ჯეროვანი სიზუსტე, შესწორება და უარყოფა) მაუწყებლები ვალდებული არიან, მიიღონ ყველა ზომა პროგრამებში მოყვანილი ფაქტების ჯეროვანი სიზუსტის უზრუნველსაყოფად და დროულად შეასწორონ შეცდომები. ამავე კანონის 56-ე მუხლის შესაბამისად, (პროგრამული შეზღუდვები) იკრძალება ომის ნებისმიერი სახით პროპაგანდა. ასევე იკრძალება ისეთი პროგრამების გადაცემა, რომლებიც რაიმე ფორმით რასობრივი, ეთნიკური, რელიგიური ან სხვაგვარი შუღლის გაღვივების, რომელიმე ჯგუფის დისკრიმინაციის ან ძალადობისკენ წაქეზების აშკარა და პირდაპირ საფრთხეს ქმნის.


საქართველოს კანონმდებლობით და საქართველოს კომუნიკაციების ეროვნული კომისიის მიერ გაცემული სალიცენზიო პირობების შესაბამისად შპს „რ-რადიოს“ ვალდებულებები პროგრამების შინაარსთან დაკავშირებით განსაზღვრულია. მიუხედავად აღნიშნული რეგულირებისა, რუსულენოვანი "სპუტნიკის" კონტენტის ტრანზიტული მაუწყებლობის შემთხვევაში დასადგენია, თუ როგორ მოხდება პროგრამული პრიორიტეტების დაცვა, განსაკუთრებით იმ პირობებში, როდესაც „რ-რადიოს“ სიხშირეზე სხვა კომპანიის კონტენტი გადაიცემა.


IDFI მოუწოდებს "რ-რადიოს", საკითხის მიმართ მომეტებული საზოგადოებრივი ინტერესის გამო, გაასაჯაროვოს  კომპანიასა და "რია ნოვოსტის" შორის გაფორმებული ხელშეკრულება. მნიშვნელოვანია აგრეთვე, კომპანიამ გააკეთოს განმარტება იმის შესახებ, თუ როგორ მოხდება სარედაქციო პრიორიტეტების დაცვის საკითხების კონტროლი, ასევე არასწორი ინფორმაციის კორექტირება და მისი უარყოფის გავრცელება.

 

 

 

სხვა მასალები ამ თემაზე
სიახლეები

IDFI-ის პანელური დისკუსია აზიის განვითარების ბანკის 54-ე წლიურ შეხვედრაზე - მდგრადი განვითარების მიზნები

07.05.2021

მოქალაქეებს აჭარის უმაღლესი საბჭოსთვის პეტიციით მიმართვა შეუძლიათ

06.05.2021

მოდერნიზებული 108-ე კონვენციის მნიშვნელობა საქართველოსთვის

27.04.2021

35 წელი ჩერნობილის კატასტროფიდან - საბჭოთა კავშირის ბირთვული მემკვიდრეობის საფრთხეები თანამედროვე საქართველოსთვის

26.04.2021
განცხადებები

IDFI-სა და GYLA-ს ერთობლივი განცხადება საჯარო მმართველობის რეფორმისა და ანტიკორუფციული სტრატეგიული დოკუმენტების დაგვიანებასთან დაკავშირებით

10.05.2021

IDFI-ის პარტნიორი ორგანიზაცია რუსეთში კვლავ ზეწოლის ქვეშაა

01.05.2021

IDFI-ს განცხადება პოლიტიკური პარტიების შეთანხმების თაობაზე

19.04.2021

IDFI ნამახვანი ჰესის პროექტთან დაკავშირებით განვითარებულ მოვლენებს ეხმიანება

12.04.2021
ბლოგპოსტები

მოსაზრებები სამუსლიმანო საქართველოს სახელმწიფოებრივ კუთვნილებასთან დაკავშირებით

10.03.2021

1921 წლის ოკუპაცია და „პერესტროიკის“ ხანის ქართული გაზეთები

10.03.2021

საბჭოთა ოკუპაციის ნარატივი რუსეთ-საქართველოს თანამედროვე ურთიერთობების ფონზე: პოლიტიკა, მეხსიერება, იდენტობა

10.03.2021

გუდმუნდურ ანდრი ასტრადსონი ისლანდიის წინააღმდეგ: მოსამართლეთა დანიშვნის შესახებ კანონმდებლობის დარღვევამ სამართლიანი სასამართლოს უფლების შელახვა გამოიწვია

10.02.2021