2015 წლის, 20 აგვისტოს იუსტიციის სასწავლო ცენტრში ინფორმაციის თავისუფლების განვითარების ინსტიტუტის (IDFI) ანალიტიკოსმა გოგა თუშურაშვილმა და იურისტმა ნინო მერებაშვილმა ჩაატარეს ტრენინგი ბიბლიოთეკარებისთვის რეგიონებიდან. ტრენინგის თემები იყო საჯარო ინფორმაციის ხელმისაწვდომობა, ღია მმართველობის პარტნიორობა, ინფორმაციის პროაქტიული გამჭვირვალობა და სახელმწიფო ბიუჯეტის საჯარო მონიტორინგი.

ტრენინგი ჩატარდა საერთაშორისო ინიციატივის „ღია მმართველობა პარტნიორობის“ ფარგლებში.

IDFI-ის წარმომადგენლებმა ტრენინგის მონაწილეებს თავიანთი გამოცდილება და ცოდნა გაუზიარეს. მათ ასევე ისაუბრეს „ღია მმართველობა პარტნიორობის (OGP)“ შესახებ. აუდიტორიას გააცნეს მისი მუშაობის მექანიზმები, ისაუბრეს ცვლილებებსა და წინ გადადგმულ ნაბიჯებზე, რომლებიც განხორციელდა მას შემდეგ, რაც საქართველო OGP-ს შეუერთდა.

ტრენინგი მიზნად ისახავდა საჯარო ინფორმაციის ხელმისაწვდომობას, მოსახლეობასა და ადგილობრივ მთავრობას შორის კომუნიკაციის გაუმჯობესებას, საზოგადოებრივი ჩართულობის გაზრდას, ბიბლიოთეკარების შესაძლებლობების ამაღლებას ელექტრონული მმართველობის და ტექნოლოგიების ფართო გამოყენების რეგიონულ დონეზე.

აღსანიშნავია, რომ საქართველოს მთავრობას OGP-ის ფარგლებში აღებული აქვს ვალდებულება, მოახდინოს საჯარო ბიბლიოთეკების მოდერნიზება და შესძინოს მათ საზოგადოებრივი ცენტრის ფუნქცია. ეს გულისხმობს არა მარტო მათ განახლებას, თანამედროვე ტექნიკით უზრუნველყოფასა და ინტერნეტთან წვდომის გაუმჯობესებას, არამედ, უპირველესად, ადამიანური რესურსის გადამზადებას, რათა მათ სრულყოფილი მომსახურება შესთავაზონ მოსახლეობას რეგიონებში.

IDFI 2011 წლიდან შეუერთდა ღია მმართველობა პარტნიორობას, ხოლო უკვე მეორე წელია, რაც მისი მმართველი კომიტეტის წევრია. ინსტიტუტი არა მხოლოდ OGP-ის ფარგლებში აღებული ვალდებულებების მონიტორინგს ახორციელებს, არამედ იგი აქტიურად თანამშრომლობს ხელისუფლებასთან, რათა მიღწეულ იქნას საერთო მიზანი.