IDFI-ს ანალიტიკოსებმა მონაწილეობა მიიღეს საქართველოს სტრატეგიული კვლევებისა და განვითარების ცენტრის (CSRDG) მიერ ორგანიზებულ სამი ორდღიან ტრენინგში თბილისში, ზუგდიდსა და ბათუმში.

ტრენინგი ჩატარდა პროექტის „საზოგადოებრივი ორგანიზაციების შესაძლებლობების გაძლიერება სოციალური სერვისების პოლიტიკის დიალოგში წვლილის შეტანისთვის საქართველოსა და უკრაინაში“ ფარგლებში. მის სამიზნე აუდიტორიას წარმოადგენდნენ ორგანიზაციები, რომლებიც სოციალურ სერვისებს აწვდიან შშმ პირებსა და ხანდაზმულებს. ექვსი დღის განმავლობაში, მსგავსი პროფილის 26 ორგანიზაციიდან 46 ადამიანმა მიიღო მონაწილეობა.

ტრენინგი მიზნად ისახავდა ადგილობრივი ორგანიზაციების გაძლიერებას ადგილობრივ და ცენტრალურ დონეზე გადაწყვეტილების მიღების პროცესში თანამონაწილეობისთვის.

IDFI-ს ანალიტიკოსებმა, თაკო იაკობიძემ, გოგა ხიშტოვანმა და გოგა თუშურაშვილმა ისაუბრეს ისეთ თემებზე, როგორიცაა: 

• სამოქალაქო სექტორის ჩართულობა საჯარო გადაწყვეტილებების მიღების პროცესში
• ინფორმაციის თავისუფლება როგორც გადაწყვეტილების მიღების პროცესში თანამონაწილეობის საშუალება

• ცენტრალური და ადგილობრივი ბიუჯეტის სტრუქტურა
• ძირითადი მონაცემების და მიმართულებების დოკუმენტი (BDD)
• საქართველოს სახელმწიფო ბიუჯეტის ძირითადი გამოწვევები
• სამოქალაქო ჩართულობის ფორმები ბიუჯეტის დაგეგმვისა და მონიტორინგის პროცესში 

ტრენინგის ერთ-ერთ მნიშვნელოვან საკითხს, ასევე წარმოადგენდა სამოქალაქო ჩართულობის თანამედროვე საშუალებები: ელ-მმართველობა და ელ-გამჭვირვალობა. აღნიშნულის ირგვლივ, საქართველოს მაგალითზე, განხილულ იქნა ინტერნეტ-მოხმარებასთან დაკავშირებით არსებული ტენდენციების საკითხი.

IDFI-ს წარმომადგენლებმა მონაწილეებს საკუთარი გამოცდილება გაუზიარეს და ისაუბრეს საჯარო ინფორმაციის ელექტრონული გამოთხოვისა და დღეს არსებული ონლაინ სამოქალაქო პლატფორმების შესახებ.