IDFI-ის ანალიტიკოსებმა 23-24 და 28-29 სექტემბერს, საქართველოს სტრატეგიული კვლევებისა და განვითარების ცენტრის (CSRDG) მიერ ორგანიზებით, ტრენინგი ჩაატარეს.

ტრენინგი პროექტის „საზოგადოებრივი ორგანიზაციების შესაძლებლობების გაძლიერება სოციალური სერვისების პოლიტიკის დიალოგში წვლილის შეტანისთვის საქართველოსა და უკრაინაში“ ფარგლებში ჩატარდა.

IDFI-ის ანალიტიკოსებმა აღნიშნული პროექტის ფარგლებში ტრენინგი უკვე მეხუთედ ჩაატარეს იმ ორგანიზაციებისთვის, რომლებიც შშმ პირებსა და ხანდაზმულებს სოციალურ სერვისებს აწვდიან. პირველი, 3 დღიანი და შემდგომი, 2 დღიანი ტრენინგი მიზნად ისახავდა ადგილობრივი ორგანიზაციების გაძლიერებას როგორც ადგილობრივ, ასევე ცენტრალურ დონეზე გადაწყვეტილების მიღების პროცესში თანამონაწილეობისთვის. 

ტრენინგის ამოცანებს წარმოადგენდა ადგილობრივი ორგანიზაციების ცნობიერების ამაღლება სამოქალაქო ჩართულობის მნიშვნელობის შესახებ, სამოქალაქო ჩართულობის თანამედროვე საშუალებების (ელ-მმართველობა და ელ-გამჭვირვალობა) გაცნობა, ცენტრალური და ადგილობრივი ბიუჯეტის ანალიზის უნარების განვითარება.

IDFI-ს ანალიტიკოსებმა თაკო იაკობიძემ და გიორგი ხიშტოვანმა ტრენინგის ფარგლებში ისაუბრეს ისეთ მნიშვნელოვან საკითხებზე, როგორიცაა სამოქალაქო სექტორის ჩართულობა საჯარო გადაწყვეტილებების მიღების პროცესში და ჩართულობის საკანონმდებლო რეგულაცია საქართველოში, ინფორმაციის თავისუფლება და საჯარო ინფორმაციის მიღების პრაქტიკა საქართველოში. ასევე განიხილეს ელ-მმართველობის, ელ-გამჭვირვალობისა და ინტერნეტის მოხმარების ტენდენციები საქართველოში, ასევე განიხილეს სახელმწიფო ბიუჯეტის პროექტის მომზადების და დამტკიცების ფაზები.

IDFI-ს წარმომადგენლებმა ტრენინგის მონაწილეებს თავიანთი გამოცდილება გაუზიარეს და კონკრეტულ შემთხვევებზე ესაუბრნენ საკუთარი პრაქტიკიდან. 

ჯამში, ტრენინგში სულ მონაწილეობდა 50 სხვადასხვა ორგანიზაციის 86 წარმომადგენელი, როგორც დედაქალაქიდან, ასევე სხვადასხვა რეგიონის ქალაქებიდანაც: ზესტაფონი, ქუთაისი, ოზურგეთი, ფოთი, გორი, მცხეთა, გურჯაანი.