პროექტში „საჯარო ბიბლიოთეკები ადგილობრივი განვითარებისთვის“ IDFI ჩართული იყო მოხალისე პარტნიორის სახით.

პროექტის ფარგლებში გარემონტდა, უახლესი ტექნიკით და უფასო ინტერნეტით აღიჭურვა ჩოხატაურის მუნიციპალიტეტის სოფ. ხიდისთავის და სიღნაღის მუნიციპალიტეტის სოფ. ნუკრიანის ბიბლიოთეკები. ამავე ბიბლიოთეკებში მოეწყო საბავშვო კუთხე, შეხვედრების ოთახი, აღიჭურვა თანამედროვე ლიტერატურით. ბიბლიოთეკების შენობებში განთავსდა საზოგადოებრივი ცენტრები - სახელმწიფო და კერძო სერვისების გამცემი პუნქტები, რომლებიც სოფლის მოსახლეობას აძლევს საშუალებას სოფლიდან გაუსვლელად მიიღოს 200-ზე მეტი სერვისი, მათ შორის პასპორტი, პირადობის მოწმობა, ქონების რეგისტრაცია, საბანკო სერვისები და ა.შ.

გარდა ამისა, ჩატარდა სამი „ტრენრების ტრენინგი“ ე.წ. ToT საპილოტე ბიბლიოთეკების და მიმდებარე სოფლების ბიბლიოთეკარებისთვის. ტრენინგები მოიცავდა შემდეგ საკითხებს: ძირითადი IT უნარები, თანამედროვე ბიბლიოთეკის სერვისები, მომხმარებელთან ურთიერთობა, მომხმარებლების მოზიდვა, ეფექტური პრეზენტაციის ჩატარების უნარები, სოციალური ქსელები და მათი მართვა, ღია მმართველობის პარტნიორობა, მოქალაქის პორტალი my.gov.ge და მისი მოხმარების ინსტრუქცია და ა.შ. აღნიშნული ტრენინგის შემდეგ ბიბლიოთეკარები თავიანთ ცოდნას და გამოცდილებას უზიარებენ თავიანთი მუნიციპალიტეტის სხვა ბიბლიოთეკების წარმომადგენლებს. შედეგად, პირდაპირ დატრენინგდა 18 ადამიანი, ხოლო არაპირდაპირ დატრენინგდა - 53 ბიბლიოთეკის წარმომადგენელი 100-მდე ბიბლიოთეკარი.

ხულოს ბიბლიოთეკა აღიჭურვა ინტერნეტით, მოხდა ხულოს და ზუგდიდის ბიბლიოთეკებისთვის წიგნების და ტექნიკის შესყიდვა. პარალელურად მიმდინარეობს ბიბლიოთეკების მუშაობის მონიტორინგის და შეფასების პროცესი, რაც გულისხმობს მომხმარებელთა კმაყოფილების კვლევას, სპეციალური პროგრამის საშუალებით ხდება ყოველთვიიურად მომხმარებელთა რაოდენობის აღრიცხვა; აღნიშნულ მონაცემებზე დაყრდნობით, ბიბლიოთეკებში მომხმარებელთა რაოდენობამ 16-17-ჯერ იმატა.