IDFI და ახალგაზრდა იურისტთა ასოციაცია (GYLA) 22 ოქტომბერს არასამთავრობო ორგანიზაციებსა და მედიის წარმომადგენლებს შეხვდნენ და ინფორმაციის თავისუფლების პრობლემურ საკითხებზე იმსჯელეს. დისკუსია USAID-ის პროგრამის „კარგი მმართველობა საქართველოში“ (G-3) ფარგლებში დაფინანსებული პროექტის ნაწილს წარმოადგენდა.

ინფორმაციის თავისუფლების შესახებ ახალი კანონი მზადდება. როგორც საიას იურისტმა სულხან სალაძემ აღნიშნა, პროექტი უკვე გაგზავნილია იუსტიციის სამინისტროში. სტუდია „მონიტორის“ ხელმძღვანელის ნინო ზურიაშვილის თქმით, საჯარო უწყებებში მომუშავე ყველა პირის სახელი და გვარი უნდა იყოს ღია. „მუდმივად ვრცელდება ინფორმაცია, რომ ესა თუ ის პირი გაფორმებულია რომელიმე დაწესებულებაში, იღებს ხელფასს, თუმცა რეალურად არ მუშაობს. მათი სახელი და გვარები ისევე უნდა იყოს ღია როგორც მაგალითად, დეპარტამენტის უფროსების“, - თქვა ზურიაშვილმა.

პრობლემურ საკითხად დასახელდა თანამდებობის პირთა ქონებრივი დეკლარაციის საიტის(declaration.ge) ხარვეზები. „ინფორმაციის თავისუფლების განვითარების ინსტიტუტის“ (IDFI) ანალიტიკოსის გოგა თუშურაშვილის თქმით, რამდენიმე პირის, მათ შორის სასჯელაღსრულების დეპარტამენტის ყოფილი თავმჯდომარის, დიმიტრი დარბაისელის ქონებრივი დეკლარაცია საიტიდან გაქრა.

ამ პრობლემის არსებობა დაადასტურა „საერთაშორისო გამჭვირვალობა - საქართველოს“ ანალიტიკოსმა მამუკა ანდღულაძემაც და თქვა რომ საიტზე არ დევს მათი ინფორმაციით ეწ. „ოდეერის“ ზაზა მაზმიშვილის დეკლარაცია, რომელიც კომუნიკაციების ეროვნული კომისიასთან ერთად შინაგან საქმეთა სამინისტროს თანამშრომელიცაა და რამდენიმე თვის წინ მის მიერ შევსებული დეკლარაცია საიტზე გამოქვეყნებული იყო.

შეხვედრის მონაწილეები შეთანხმდნენ, რომ საერთო პრობლემების იდენტიფიცირებას მოახდენენ და ახალი კანონპროექტის გაცნობის შემდეგ საკუთარ შენიშვნებსა და რეკომენდაციებს ჩამოაყალიბებენ.