ევროატლანტიკური კოალიცია ცხინვალის იზოლატორში არჩილ ტატუნაშვილის გარდაცვალებას ეხმაურება

განცხადებები 28 თებერვალი 2018

სამოქალაქო საზოგადოების ორგანიზაციები უკიდურეს შეშფოთებას გამოვხატავთ ცხინვალის იზოლატორში საქართველოს მოქალაქის არჩილ ტატუნაშვილის საეჭვო გარემოებაში გარდაცვალების გამო. მკაცრად ვგმობთ რუსეთის მიერ ოკუპირებული ე.წ. სამხრეთ ოსეთის დე-ფაქტო რეჟიმის არაჰუმანურ ქმედებას და გარდაცვლილის ოჯახისთვის ცხედრის გადმოცემის გაჭიანურებას. საგანგაშოა, რომ კვლავ ე.წ. „სამხრეთ ოსეთის“ ტერიტორიაზე რჩება არჩილ ტატუნაშვილთან ერთად დაკავებული საქართველოს ორი მოქალაქე - ლევან ქუტაშვილი და იოსებ პავლიაშვილი.  

 
არჩილ ტატუნაშვილი ოკუპირებულ ცხინვალის რეგიონში უკანონოდ დააკავეს აბსურდული და გამოგონილი ბრალდებით. იგი დაკავების მომენტიდან მოკლებული იყო შესაძლებლობას ესარგებლა ფუნდამენტური უფლებებით, დაექვემდებარა წამებას და არაადამიანურ მოპყრობას, საბოლოოდ კი წაერთვა სიცოცხლის უფლება. მივიჩნევთ, რომ ცხედრის გადმოცემის გაჭიანურება მიმართულია ობიექტური გამოძიებისათვის ხელის შეშლისკენ და ადასტურებს ეჭვებს ტატუნაშვილის მიზანმიმართული მკვლელობის შესახებ.  
 
 
ხაზგასმით აღვნიშნავთ, რომ არჩილ ტატუნაშვილის წინაშე ჩადენილ დანაშაულში პასუხისმგებლობა ეკისრება რუსეთის ფედერაციას, რომელიც ეფექტურ კონტროლს ახორციელებს ოკუპირებულ ცხინვალის რეგიონში. რუსეთის საოკუპაციო რეჟიმის მიერ წახალისებული და დაუსჯელია საქართველოს მოქალაქეების გატაცებისა და მათ წინააღდეგ ფიზიკური ძალის გამოყენების ფაქტები. კვლავ დაუსჯელია 2016 წლის 19 მაისს აფხაზეთის საოკუპაციო ხაზთან მოკლული გიგა ოთხოზორიას მკვლელი ე.წ. აფხაზი მესაზღვრე. 
 
 
მისასალმებელია საერთაშორისო საზოგადოებისა და საქართველოს მეგობარი ქვეყნების ოფიციალური უწყებების დროული რეაგირება არჩილ ტატუნაშვილის გარდაცვალების ფაქტზე. ამასთან, მნიშვნელოვანია, საერთაშორისო საზოგადოებამ გააძლიეროს ძალისხმევა საქართველოს ოკუპირებულ რეგიონებში ადამიანის უფლებათა დარღვევის ფაქტებზე რუსეთის ფედერაციის პასუხისმგებლობის დასაყენებლად. 
 
 
მოვუწოდებთ რუსეთის ფედერაციას და ე.წ. სამხრეთ ოსეთის დე-ფაქტო მთავრობას დაუყოვნებლივ გადმოსცეს არჩილ ტატუნაშვილის ცხედარი ქართულ მხარეს და უზრუნველყოს საქართველოს ორი მოქალაქისთვის ადმინისტრაციული საზღვრის გადმოკვეთის საშუალება. 
 
 
მივმართავთ საერთაშორისო ორგანიზაციებს, გამოიყენონ ყველა ბერკეტი საქართველოს მოქალაქეების - ქუტაშვილისა და პავლიაშვილის გამოსახსნელად, ასევე, არჩილ ტატუნაშვილისა და გიგა ოთხოზორიას გარდაცვალების ფაქტზე დროული და ეფექტური გამოძიების ჩასატარებლად, რათა პასუხისგებაში მიეცეს მკვლელობებში მონაწილე ყველა პირი.  
 
 
მოვუწოდებთ საქართველოს ხელისუფლებას, გააქტიუროს მუშაობა საერთაშორისო საზოგადოებასთან ოკუპირებულ ტერიორიტებზე ადამიანის უფლებების კუთხით არსებულ მდგომარეობასთან დაკავშირებით; მიიღოს ყველა ზომა ოკუპაციის ხაზთან მცხოვრები პირების უსაფრთხოებისა და უფლებების დასაცავად. 

 

- სამართლიანი არჩევნებისა და დემოკრატიის სართაშორისო საზოგადოება 
 
- საერთაშორისო გამჭვირვალობა-საქართველო 
 
- ფონდი ღია საზოგადოება - საქართველო 
 
- საქართველოს ატლანტიკური საბჭო 
 
- მსოფლიო გამოცდილება საქართველოსთვის 
 
- საზოგადოება და ბანკები 
 
- სამოქალაქო განვითარების სააგენტო 
 
- ეკონომიკური პოლიტიკის კვლევის ცენტრი 
 
- კვლევითი ჟურნალისტიკისა და ადვოკატირების ცენტრი 
 
- მწვანე ალტერნატივა 
 
- კავშირი „საფარი“ 
 
- ინფორმაციის თავისუფლების განვითარების ინსტიტუტი 
 
- საქართველოს დემოკრატიული ინიციატივა 
 
- საქართველოს გაეროს ასოციაცია 
 
- წამების მსხვერპლთა რეაბილიტაციის ცენტრი „ემპათია“ 
 
- მედიის განვითარების ფონდი 
 
- საქართველოს რეფორმების ასოციაცია
სხვა მასალები ამ თემაზე
სიახლეები

გამოფენა „საბჭოთა კავშირში რეპრესირებული ქალები“ დედაენის ბაღში

23.07.2021

საბჭოთა რეპრესიები ქართველი სტუდენტების მეხსიერებაში

22.07.2021

საინფორმაციო შეხვედრა ქობულეთის მუნიციპალიტეტში

21.07.2021

საჯარო მმართველობის რეფორმის სამოქმედო გეგმის შესრულების 2019 – 2020 წლების ალტერნატიული მონიტორინგის შემაჯამებელი ანგარიშები

20.07.2021
განცხადებები

სამოქალაქო ორგანიზაციებისა და მედიასაშუალებების წერილი შარლ მიშელს

19.07.2021

IDFI საქართველოს პრემიერ-მინისტრისა და შინაგან საქმეთა მინისტრის გადადგომის მოთხოვნას ეხმიანება

12.07.2021

მწუხარებას გამოვთქვამთ “TV პირველის“ ოპერატორის, ალექსანდრე ლაშქარავას გარდაცვალების გამო

11.07.2021

5 ივლისის ძალადობის უმძიმესი შედეგების გამო საქართველოს პრემიერ მინისტრმა თანამდებობა დაუყოვნებლივ უნდა დატოვოს

11.07.2021
ბლოგპოსტები

ფართოზოლოვანი ინფრასტრუქტურის სახელმწიფო პროგრამის საპილოტე პროექტი ოზურგეთში

13.05.2021

მოსაზრებები სამუსლიმანო საქართველოს სახელმწიფოებრივ კუთვნილებასთან დაკავშირებით

10.03.2021

1921 წლის ოკუპაცია და „პერესტროიკის“ ხანის ქართული გაზეთები

10.03.2021

საბჭოთა ოკუპაციის ნარატივი რუსეთ-საქართველოს თანამედროვე ურთიერთობების ფონზე: პოლიტიკა, მეხსიერება, იდენტობა

10.03.2021