2024 წლის 18 ნოემბერს ჩეხეთში, ჩეხეთის რესპუბლიკის პარლამენტის დეპუტატთა პალატის სპიკერის მარკეტა პეკაროვა ადამოვას, უსაფრთხოების კომიტეტის თავმჯდომარის პაველ ჟაჩეკის ეგიდითა და პრაღის უკრაინის ინსტიტუტის თანამშრომლობით, საერთაშორისო კონფერენცია “საბჭოთა და რუსული დივერსია ევროპის წინააღმდეგ” გაიმართა.

საერთაშორისო კონფერენციაში მონაწილეობდნენ უსაფრთხოების ექსპერტები, ისტორიკოსები და პოლიტიკოსები ჩეხეთიდან, ბრიტანეთიდან, უკრაინიდან და საქართველოდან. მათ შორის ტომაშ პოიარი (ჩეხეთის რესპუბლიკის მთავრობის ოფისის მრჩეველი ეროვნული უსაფრთხოების საკითხებში),  რიჩარდ დერლოუ (ბრიტანეთის საიდუმლო სადაზვერვო სამსახურის ყოფილი დირექტორი (1999–2004), ლუბოშ ვესელი (ჩეხეთის რესპუბლიკის საგარეო საქმეთა სამინისტროს სპეციალური წარმომადგენელი რუსეთის ფედერაციასთან დაკავშირებული პოლიტიკის კოორდინაციის საკითხებში), იარინა აისინევიჩი (საერთო-უკრაინული ფორუმი დემოკრატიისთვის (DemForum)) და სხვები.

კონფერენციაში მონაწილეობდა IDFI-ს მეხსიერებისა და დეზინფორმაციის კვლევების მიმართულების ხელმძღვანელი ანტონ ვაჭარაძე, რომელმაც პანელის “საბჭოთა დივერსია: ისტორიული პერსპექტივა” ფარგლებში ისაუბრა 2024 წლის საპარლამენტო არჩევნებამდე გაზრდილ დეზინფორმაციასა და პროპაგანდაზე, ასევე არჩევნებზე მანიპულაციების, ამომრჩეველთა მასშტაბური მოსყიდვის, დაშინების და სხვა ფაქტებზე. ანტონ ვაჭარაძემ განიხილა განსხვავებები და მსგავსებები მოლდოვის არჩევნებთან მიმართებით. განსაკუთრებული ყურადღება კი გაამახვილა კრემლის საჯარო განცხადებებზე, რუსი პროპაგანდისტებისა და გავლენის აგენტების საქართველოში ვიზიტებსა და ქვეყნის შიდა პოლიტიკაში ჩარევაზე.მან ასევე აღნიშნა, რომ საკანონმდებლო ცვლილებები, როგორიცაა ე.წ “უცხოური აგენტებისა” და ცენზურის კანონები, ქართველი ოფიციალური პირების მხრიდან რუსეთის წინააღმდეგ კრიტიკული განცხადებების ნაკლებობასთან ერთად, მიანიშნებს ევროინტეგრაციის გზიდან პოტენციურ გადახვევაზე  და მზარდ თანხვედრაზე კრემლის დღის წესრიგთან.

გაეცანით დღის წესრიგს აქ.