კანონპროექტი საქართველოს ორგანულ კანონში "საქართველოს შრომის კოდექსი" ცვლილების შეტანის თაობაზე, რომელიც საქართველოს იუსტიციის სამინისტროს ავტორობით შეიქმნა, საქართველოს პარლამენტს წარედგინა. პროექტის პარლამენტისათვის წარდგენამდე, პროფესიულ კავშირებს, დამსაქმებელთა გაერთიანებებს, სამოქალაქო სექტორის წარმომადგენლებსა თუ www.matsne.gov.ge -ს მომხმარებლებს, საშუალება ქონდათ, გამოეთქვათ საკუთარი მოსაზრებები და შენიშვნები, რომელთა ნაწილი გათვალისწინებულ იქნა კანონპროექტის გადამუშავებულ ვერსიაში. შეგახსენებთ, რომ IDFI გამოქვეყნებისთანავე გამოეხმაურა კანონპროექტის პირველსა და მეორე რედაქციას და იუსტიციის სამინისტროს, სამსახურიდან გათავისუფლებული პირის მიერ გამოუყენებელი შვებულების ნაცვლად კომპენსაციის მიღების საკითხის კანონით დარეგულირების აუცილებლობის თაობაზე საკუთარი დასაბუთებული მოსაზრება წარუდგინა.

აღსანიშნავია, რომ პარლამენტისათვის წარდგენილ პროექტში გათვალისწინებულია აღნიშნულ საკითხთან დაკავშირებული ჩვენი რეკომენდაციების ნაწილი. ნორმატიული აქტის პროექტი სავარაუდოდ, 3-5 აპრილს იქნება პარლამენტის პლენარულ სხდომაზე განხილული.
მივესალმებით შრომის კანონმდებლობის რეფორმირების პროცესში სამოქალაქო საზოგადოების წარმომადგენლების ჩართვასა და აღნიშნული პროცესის გამჭვირვალობას.