2012 წლის 6 ივლისს სასტუმრო „ბეთსიში“ მასმედიის წარმომადგენლებისთვის გაიმართა სემინარი თემაზე - „ინფორმაციის თავისუფლება და საჯარო დოკუმენტების ხელმისაწვდომობა“.

სემინარი ჩატარდა ევროპის საბჭოს და ევროკავშირის ერთობლივი პროგრამის - „მასობრივი საინფორმაციო საშუალებების თავისუფლების, პროფესიონალიზმის და პლურალიზმის მხარდაჭერა სამხრეთ კავკასიასა და მოლდოვაში“ ფარგლებში ინფორმაციის თავისუფლების განვითარების ინსტიტუტთან (IDFI) თანამშრომლობით. 

შეხვედრა გახსნეს ევროპის საბჭოს წარმომადგენელმა ბათუ წულუკიანმა და ინფორმაციის თავისუფლების განვითარების ინსტიტუტის თამჯდომარემ ლევან ავალიშვილმა. IDFI-ს დირექტორმა გიორგი კლდიაშვილმა ისაუბრა ინფორმაციის თავისუფლების ისტორიაზე, ინფორმაციის თავისუფლებასთან დაკავშირებულ საერთაშორისო კანონმდებლობაზე და თანამედროვე ტენდენციებზე. 

ინფორმაციის თავისუფლების ქართულ კანონმდებლობაზე, ადმინისტრაციულ ორგანოებში საჯარო ინფორმაციის ხელმისაწვდომობასა და სასამართლო პრაქტიკაზე სემინარის მონაწილეებს პრეზენტაცია წარუდგინა ლევან ავალიშვილმა.

საჯარო დაწესებულებებიდან სასურველი ინფორმაციის დროულად და სრულყოფილი ფორმით მიღება ხშირად ძალიან რთულია. ეს უმეტესწილად დამოკიდებულია მოთხოვნილი ინფორმაციის შინაარსზე, თუმცა არსებობს მნიშვნელოვანი ფაქტორები, რომელთა გათვალისწინებაც აადვილებს ინფორმაციის მიღებას. პირველ რიგში აუცილებელია კანონით განსაზღვრული უფლებების ცოდნა, გადამწყვეტი მნიშვნელობა აქვს მოთხოვნის სწორად და გარკვევით ფორმულირებას. აუცილებელია ასევე განცხადების შედგენისას დავიცვათ გარკვეული სტანდარტი. 

დისკუსია გაიმართა ზოგადად საქართველოში არსებულ სიტუაციაზე ინფორმაციის თავისუფლების კუთხით. იმ პრობლემებზე, რომლებსაც ჟურნალისტები, არასამთავრობო ორგანიზაციები ან ჩვეულებრივი მოქალაქეები აწყდებიან საჯარო ინფორმაციის მოთხოვნისას და ასევე იმ მიღწევებზე, რომელიც საზოგადოებისთვის საინტერესო საკითხების ოფიციალურ ვებ-გერდებზე პროაქტიულად გამოქვეყნებას ეხება.

ქართველ ჟურნალისტებს გამოცდილება გაუზიარა და ბულგარეთში ინფორმაციის თავისუფლების სფეროში არსებული კანონმდებლობის და ბულგარელი ჟურნალისტების მიერ მისი გამოყენების შესახებ მოუთხრო ინფორმაციის ხელმისაწვდომობის პროგრამის (Access to Information Program) სამართლებრივი ჯგუფის ხელმძღვანელმა ალექსანდრე კაშუმოვმა. 

სემინარზე გაიმართა დოკუმენტური ფილმის „ მასობრივი საინფორმაციო საშუალებები და ინფორმაციის ხელმისაწვდომობა “ - ჩვენება, რომელშიც წარმოდგენილი იყო 5 ისტორია ბულგარელი ჟურნალისტების მიერ წარმატებით განხორციელებული ჟურნალისტური გამოძიებების შესახებ.

ქართული მედიის გამოცდილებაზე და თავისუფალი, აქტიური და ჯანსაღი მედიის როლის განსაკუთრებულ მნიშვნელობაზე დამსწრე საზოგადოებას გაზეთ “რეზონანსის” მთვარი რედაქტორი ლაშა ტუღუში ესაუბრა. აქტიური განხილვის საკითხი იყო ასევე „Must-carry”-ის თემა. სემინარი მიმდინარეობდა აქტიური დისკუსიის ფორმატში და მასში მონაწილეობა მიიღეს როგორც ბეჭდური ასევე ინტერნეტ მედიის და ტელევიზიის ჟურნალისტებმა და იურისტებმა.