ინფორმაციის თავისუფლების განვითარების ინსტიტუტის (IDFI) თანამშრომლებმა გამართეს ორდღიანი სამუშაო შეხვედრა, რომლის მიზანიც იყო ორგანიზაციის 3 წლიანი სტრატეგიის და სამოქმედო გეგმის ჩამოყალიბება. შეხვედრა ჩატარდა „ორგანიზაციული განვითარების გრანტის“ ფარგლებში, რომელსაც ღია საზოგადოების ინსტიტუტის ბუდაპეშტის ფონდი (OSI) აფინანსებს.

შეხვედრას უძღვებოდა IDFI-ს საზოგადოებასთან ურთიერთობის მენეჯერი მერი მახარაშვილმა, რომელსაც აქვს ქვეყნის ფარგლებში და მის გარეთ (ზიმბაბვე, მოზამბიკი, აზერბაიჯანი) მსხვილ საერთაშორისო და ადგილობრივ ორგანიზაციებში მუშაობის 15 წლიანი გამოცდილება. მისი სამუშაო გამოცდილება მოიცავს შემდეგ სფეროებს: შიდა და გარე კომუნიკაციები, დონორებთან ურთიერთობა, საჯარო და კერძო პარტნიორობები, ორგანიზაციის/ადვოკატირების სტრატეგიის განვითარება, საზოგადოებასთან ურთიერთობა, ინოვაციური მედიისა და გრანტების მოძიების კამპანიის განვითარება.

შეხვედრის მიმდინარეობისას თანამშრომლებს საშუალება ქონდათ გაცნობოდნენ სხვადასხვა დიდი საერთაშორისო ორგანიზაციების პრაქტიკას სტრატეგიული დაგეგმარების, ორგანიზაციული სტრუქტურის ჩამოყალიბების, მედიასთან, დონორებთან, თუ პარტნიორებთან ეფექტური კომუნიკაციის წარმართვის თაობაზე.

სამუშაო შეხვედრის დასასრულს შეჯამდა ორივე დღეს მიღებული ინფორმაცია, თანამშრომლებმა იმსჯელეს პრობლემებსა და დასახეს მათი გადაჭრის გზები, რაც ხელს შეუწყობს IDFI-ს განვითარებას მომავალში.

ღია საზოგადოების ინსტიტუტის ბუდაპეშტის ფონდის (OSI) „ორგანიზაციული განვითარების გრანტის“ მიზანია IDFI-ის, როგორც კვლევითი ორგანიზაციის, განვითარება შემდეგი კონკრეტული მიმართულებებით: კვლევების ხარისხი, კომუნიკაცია და ადვოკატირება, შიდა მმართველობის დახვეწა და გაძლიერება.