IDFI-ის მიერ მომზადებული გამჭვირვალე სახელმწიფო შესყიდვების რეიტინგი (TPPR) არის სახელმწიფო შესყიდვების სისტემების შეფასების უნივერსალური მეთოდოლოგია, რომლის მიზანია სახელმწიფო შესყიდვების სამართლებრივი ჩარჩოების, ისევე როგორც მათი აღსრულების ძლიერი და სუსტი მხარეების დადგენა.

მეთოდოლოგია შედგება 64 ინდიკატორისგან, რომელსაც თანაბარი ღირებულება აქვთ (თითო ქულა). ინდიკატორების ნაწილი ჩაშლილია დამატებით ქულობრივ კომპონენტებად.

მეთოდოლოგია მოიცავს სახელმწიფო შესყიდვების სისტემის ყველა ძირითად კომპონენტს, თუმცა განსაკუთრებული ყურადღება ეთმობა სახელმწიფო შესყიდვების სისტემის გამჭვირვალობას.

მეთოდოლოგიის ინდიკატორების შერჩევა მეტწილად ეფუძნებოდა საუკეთესო საერთაშორისო პრაქტიკას, საერთაშორისო სტანდარტებს და სახელმწიფო შესყიდვების სფეროში არსებულ სხვა მეთოდოლოგიებს, როგორიცაა:

- ევროპის რეკონსტრუქციისა და განვითარების ბანკის (EBRD) მეთოდოლოგია და სტანდარტი;

- მსოფლიო სავაჭრო ორგანიზაციის შეთანხმება სახელმწიფო შესყიდვების შესახებ (GPA);

- ეკონომიკური თანამშრომლობისა და განვითარების ორგანიზაციის (OECD) მეთოდოლოგია და პრინციპები;

- ევროკავშირის სტანდარტი (დირექტივა 2014/24 / EU);

- ღია ხელშეკრულებების მონაცემთა სტანდარტი (OCDS).

მეთოდოლოგია მომზადდა ღია საზოგადოების ინსტიტუტის - ბუდაპეშტის ფონდის ფინანსური მხარდაჭერით.