2014 წლის 15 სექტემბერს, IDFI-მ (ინფორმაციის თავისუფლების განვითარების ინსტიტუტი) დაიწყო ტრენინგები ელექტრონული ჩართულობის შესახებ. ტრენინგები მიზნად ისახავს ახალგაზრდებში კრიტიკული აზროვნების განვითარებას, მათი ცნობიერების ამაღლებას იმ თანამედროვე მექანიზმების შესახებ, რომლებიც საჭიროა მთავრობის ანგარიშვალდებულების მისაღწევად.

15 სექტემბრის ტრენინგის მონაწილეებმა მიიღეს ინფორმაცია საჯარო ინფორმაციის, მისი ელექტრონულად გამოთხოვნის გზების, ინფორმაციის პროაქტიულად გამოქვეყნების, საჯარო უწყებების Facebook და ვებ-გვერდების მონიტორინგის ძირითადი მეთოდებისა და ღია რესურსების პრაქტიკაში გამოყენების შესახებ. მათ, ასევე, გადაეცათ ელექტრონული ჩართულობის სახელმძღვანელო, სადაც აღნიშნული საკითხებია განხილული და ნებისმიერ ადამიანს აწვდის ძირითად მიმართულებებს ხელისუფლების ონლაინ რესურსებისა და საქართველოში ელექტრონული მმართველობის დონის შეფასებისთვის. საერთო ჯამში სულ ჩატარდება 6 ტრენინგი, 15-24 სექტემბრის დროით მონაკვეთში.

აღსანიშნავია, რომ ტრენინგების შემდეგ მონაწილეებს შესაძლებლობა ექნებათ თავად შეისწავლონ Facebook-ზე საჯარო დაწესებულებების გვერდები და მათი ოფიციალური ვებ-გვერდები, გამოითხოვონ საჯარო ინფორმაცია, დააკვირდნენ ხელისუფლების საქმიანობას და მოამზადონ ბლოგ-პოსტი საკუთარი მონიტორინგის შედეგების საფუძველზე. ტრენინგის მონაწილეები ასევე მიიღებენ მონაწილეობას ესეების კონკურსში, რომლის საუკეთესო 10 მონაწილის ბლოგი გამოქვეყნდება IDFI-ის გვერდზე და სამ გამარჯვებულს გადაეცემა Kindle.

საგულისხმოა, რომ ტრენინგზე დასწრების სურვილი 300-მდე აპლიკანტმა გამოთქვა, რამაც შერჩევის პროცესი საკმაოდ კონკურენტული გახადა. საბოლოო ჯამში 6 ერთდღიანი ტრენინგისთვის შეირჩა 60 მონაწილე, ძირითადად სტუდენტები, ბლოგერები, დამწყები ჟურნალისტები და სამოქალაქო აქტივისტები, რომლებიც დაინტერესებულები არიან მთავრობის ანგარიშვალდებულების საკითხებით და მიღებული ცოდნას პროფესიულ თუ პრაქტიკულ საქმეში გამოიყენებენ.

ტრენინგები იმართება პროექტის „ახალგაზრდებში მთავრობის გასაკონტროლებლად საჭირო ელ-უნარების განვითარება“ ფარგლებში და ხორციელდება საქართველოში აშშ-ის საელჩოს ფინანსური მხარდაჭერით.