საჯაროდ ხელმისაწვდომ ინფორმაციაზე დაყრდნობით, IDFI მიიჩნევს, რომ ოთარ ფარცხალაძის მიერ საქართველოს მოქალაქეობის ფლობა არღვევს საქართველოს კონსტიტუციისა და ორგანული კანონის მოთხოვნებს. ამდენად, იუსტიციის სამინისტრომ უნდა დაიწყოს მისთვის მოქალაქეობის შეწყვეტის პროცედურა ან/და გააკეთოს შესაბამისი განმარტება. 

2023 წლის 15 სექტემბერს ცნობილი გახდა, რომ აშშ-ს სახელმწიფო დეპარტამენტმა საქართველოს ყოფილ გენერალურ პროკურორს, ოთარ ფარცხალაძეს  სანქციები დაუწესა. აღსანიშნავია, რომ ოთარ ფარცხალაძე მოხვდა რუსეთის წინააღმდეგ დაწესებული სანქციების მორიგ  პაკეტში. სანქცირების მიზეზად დასახელდა მისი ბიზნეს კავშირები FSB-ს (რუსეთის უშიშროების ფედერალური სამსახური) ოფიცერთან და ამ გზით საქართველოს პოლიტიკურ და საზოგადოებრივ ცხოვრებაში რუსული გავლენების გაძლიერება. სანქციების დოკუმენტიდან ირკვევა, რომ ფარცხალაძემ სრულად მიიღო რუსული იდენტობა/მოქალაქეობა, რაშიც, სავარაუდოდ, ბიზნეს პარტნიორი/FSB-ს ოფიცერი დაეხმარა. 

ოთარ ფარცხალაძე არის მმართველ პარტიასთან აფილირებული პირი და მისი კავშირი მტერი სახელმწიფოს სადაზვერვო ორგანოებთან არაერთ კითხვას ბადებს. განსაკუთრებით, “ქართული ოცნების” წევრთა მიერ ფარცხალაძის გამართლების მიმდინარე მცდელობების გათვალისწინებით. მას შემდგომ, რაც ფარცხალაძეს საქართველოს ბანკებმა ანგარიშები გაუყინეს, მმართველი პარტიის თავმჯდომარემ, ირაკლი კობახიძემ განაცხადა, რომ ეს იყო კონსტიტუციის დარღვევა, ვინაიდან ფარცხალაძეს, როგორც საქართველოს მოქალაქეს კონსტიტუცია განსაკუთრებული დაცვის გარანტიებს ანიჭებს. საჯაროდ ხელმისაწვდომ მონაცემებზე დაყრდნობით მიგვაჩნია, რომ ოთარ ფარცხალაძის საქართველოს მოქალაქესთან გათანაბრება არ არის თავსებადი საქართველოს კონსტიტუციისა და ორგანული კანონის მოთხოვნებთან და კომპეტენტურმა ორგანოებმა უნდა დაიწყონ ფარცხალაძისთვის საქართველოს მოქალაქეობის შეწყვეტის პროცედურები. 

საქართველოს კონსტიტუციის 32-ე მუხლის მე-2 პუნქტისა და 52-ე მუხლის პირველი პუნქტის “ე” ქვეპუნქტის, ასევე “საქართველოს მოქალაქეობის შესახებ” საქართველოს ორგანული კანონის 21-ე მუხლის პირველი პუნქტის “ა” ქვეპუნქტის თანახმად, საქართველოს მოქალაქის მიერ სხვა ქვეყნის მოქალაქეობის მიღება იწვევს საქართველოს მოქალაქეობის დაკარგვას, თუ მას საქართველოს პრეზიდენტისთვის არ მიუმართავს წინასწარ ან შემდგომ, შესაბამისად, მოქალაქეობის შენარჩუნების ან/და მოქალაქეობის საგამონაკლისო წესით მინიჭების მოთხოვნით. 

საქართველოს პრეზიდენტმა 2023 წლის 18 სექტემბერს განაცხადა, რომ ოთარ ფარცხალაძისთვის მოქალაქეობის საკითხზე მასთან არანაირი მოთხოვნა არ შესულა. სხვაგვარად, ოთარ ფარცხალაძეს პრეზიდენტის ბრძანებულებით საქართველოს მოქალაქეობა არ შეუნარჩუნებია და არც დაკარგვის შემდგომ მინიჭებია.

ოთარ ფარცხალაძემ რუსეთის ფედერაციის მოქალაქეობა მიიღო საქართველოს მოქალაქეობის შენარჩუნების გარეშე. შესაბამისად, სახეზეა საქართველოს მოქალაქეობის დაკარგვის აბსოლუტური საფუძველი. მისთვის საქართველოს მოქალაქეობის შეწყვეტას სჭირდება მხოლოდ ფორმალური გაფორმება. ამისთვის აუცილებელია, იუსტიციის სამინისტროს სსიპ სახელმწიფო სერვისების განვითარების სააგენტო დაემორჩილოს კონსტიტუციისა და კანონის მოთხოვნებს, მოამზადოს დასკვნა ოთარ ფარცხალაძისთვის საქართველოს მოქალაქეობის შეწყვეტის თაობაზე და მიმართოს საქართველოს პრეზიდენტს.