მედიის ადვოკატირების კოალიცია მკაცრად გმობს საზოგადოებრივი მაუწყებლის ხელმძღვანელობის გადაწყვეტილებას დახუროს 12-წლიანი ისტორიის მქონე გადაცემა „რეალური სივრცე", უკანონოდ გაათავისუფლოს მისი წამყვანი ნინო ზაუტაშვილი, გააფრთხილოს ჟურნალისტები და შექმნას არასათანადო სამუშაო გარემო. აღნიშნული გადაწყვეტილება წარმოადგენს მიზანმიმართულ რეპრესიულ ქმედებას იმ ჟურნალისტების წინააღმდეგ, რომლებიც ღიად აკრიტიკებდნენ მაუწყებლის მიკერძოებულ სარედაქციო პოლიტიკას, ამხელდნენ მასში არსებულ პოლიტიკურ გავლენებს და “ქართული ოცნების” სასარგებლოდ პროპაგანდას. 

საზოგადოებრივი მაუწყებლის გადაცემა „რეალური სივრცე“ წლების განმავლობაში გამორჩეულ მედია პროდუქტს ქმნიდა, რომელიც ქვეყანაში არსებულ აქტუალურ სოციალურ და პოლიტიკურ საკითხებზე საზოგადოებას შესაბამისს ინფორმაციასა და ანალიზს სთავაზობდა. გადაცემის დახურვის გადაწყვეტილების შემდეგ, “რეალური სივრცის” დარჩენილმა გუნდმა ტელევიზიის მენეჯმენტის შეთავაზებაზე მუშაობა რადიოს დილის გადაცემაში, ვებგვერდზე, თუ პრომოუშენის დეპარტამენტსა და მუსიკალურ გადაცემაზე გაეგრძელებინა, უარი თქვა. „მენეჯმენტის მიერ გამოგზავნილ შეთავაზებაზე ხელის მოწერა ნიშნავს, რომ საკუთარი ნებით მოვაწეროთ ხელი ამ გადაცემის, ანუ იმ სივრცის დახურვას, რომელიც თქვენთვის შევქმენით. ამიტომ ჩვენ უარს ვამბობთ მენეჯმენტის შემოთავაზებაზე, რომელმაც უკვე გვითხრა, რომ უარი ნიშნავს ჩვენთან შრომითი ხელშეკრულების გაწყვეტას”,  ნათქვამია თანამშრომლების განცხადებაში. 

მაუწყებლის დირექტორმა თინათინ ბერძენიშვილმა და სამეურვეო საბჭოს თავმჯდომარე ვასილ მაღლაფერიძემ და მათმა მომხრე საბჭოს წევრმა, მედიაში შექმნა ისეთი პირობები, რომლებიც გადაცემის გუნდს არ აძლევს საკუთარი პროფესიული მოვალეობის შესრულების შესაძლებლობას. გუნდისთვის შეთავაზებული სამუშაო პირობები წარმოადგენს მიზანმიმართულ მცდელობას გუნდის დასანაწევრებლად და პროფესიული საქმიანობის შესაძლებლობის წასართმევად. სამწუხაროდ, მაუწყებლის ხელმძღვანელობა არა მხოლოდ იყენებს სამსახურიდან უკანონო გათავისუფლების მეთოდს, არამედ ასევე მიმართავს დისციპლინურ სანქციებს კრიტიკულად განწყობილი თანამშრომლების წინააღმდეგ.

მედიის ადვოკატირების კოალიცია აღნიშნავს, რომ თინათინ ბერძენიშვილისა და ვასილ მაღლაფერიძის ხელმძღვანელობით მაუწყებელი სისტემატურად ახორციელებს დამოუკიდებელი და პროფესიონალი ჟურნალისტების დევნას, მათ შორის ვასილ ივანოვ-ჩიქოვანის, ნინო ზაუტაშვილისა და „რეალური სივრცის" გუნდის სხვა წევრების მიმართ. ეს ქმედებები მიმდინარეობს იმ ფონზე, როდესაც საზოგადოება აქტიურად ითხოვს მაუწყებლისგან თავისი კონსტიტუციური ვალდებულებების შესრულებას და ხალხის ხმის გაჟღერებას, ხოლო ზემოხსენებული ჟურნალისტები ღიად ითხოვდნენ ეთერების გახსნას და მოქალაქეების სათანადო ინფორმირებას.

მაუწყებლის ხელმძღვანელობის ქმედებები პირდაპირ ეწინააღმდეგება საზოგადოებრივი მაუწყებლის მანდატს და საერთაშორისო სტანდარტებს. მნიშვნელოვანია აღინიშნოს, რომ საზოგადოებრივი მაუწყებლის ხელმძღვანელობა მოხსენიებულია ევროპარლამენტის რეზოლუციაში, რომელიც მათ წინააღმდეგ სანქციების დაწესებისკენ მოუწოდებს. ეს კიდევ ერთხელ ადასტურებს, რომ მათი საქმიანობა შორს არის დემოკრატიული სტანდარტებისგან და მხოლოდ ივანიშვილის რეჟიმის ინტერესებს ემსახურება.

მედიის ადვოკატირების კოალიცია სრულ სოლიდარობას უცხადებს საზოგადოებრივი მაუწყებლის დამოუკიდებელ ჟურნალისტებს. მათ მიერ გამოჩენილი პროფესიული სიმამაცე და ერთგულება ჟურნალისტური სტანდარტებისადმი არის მაგალითი მთელი ქართული მედიისთვის.

საზოგადოებრივი მაუწყებელი უნდა იყოს ხალხის საკუთრება და არა ბიძინა ივანიშვილის “ქართული ოცნების” პროპაგანდისტული რუპორი. ჩვენ გავაგრძელებთ ბრძოლას, რათა მაუწყებელმა შეასრულოს თავისი კონსტიტუციური ვალდებულება და ემსახუროს საზოგადოების ინტერესებს.