სანდრო როჩიკაშვილი

12 დეკემბერს იუსტიციის სამინისტროში შედგა სტუდენტების იდეების პრეზენტაცია და შემდგომი დაჯილდოება საერთაშორისო ანტიკორუფციულ დღესთან დაკავშირებით გამოცხადებული კონკურსის ფარგლებში. კონკურსში მონაწილეობის მიღების საშუალება ჰქონდა საქართველოს ნებისმიერ სტუდენტს მესამე კურსზე ან ზემოთ.

ამორჩეულმა ხუთმა სტუდენტმა თავიანთი იდეები წარადგინეს მცირე აუდიტორიის წინაშე, რომელშიც იმყოფებოდნენ საქართველოს სამოქალაქო საზოგადოების სხვადასხვა წარმომადგენლები და ექსპერტები კორუფციასა და “პარტნიორობის ღია მმართველობისთვის” სფეროებში. პრეზენტაციების შემდეგ აუდიტორიამ ამოირჩია საუკეთესო იდეები.

პრეზენტაციების დიდ ნაწილში წამოიჭრა სტუდენტების უფრო დიდი ჩართულობის ხელშეწყობის იდეა ისეთ საკითხებში, როგორიცაა კორუფციასთან ბრძოლა, ინფორმაციის ხელმისაწვდომობა და გამჭვირვალობა. აღსანიშნავია, რომ კონკურსში მონაწილეობა მიიღო სულ ოცმა სტუდენტმა, რაც ძალიან დაბალი მაჩვენებელია, თუ გათვალისწინებთ იმ ფაქტს, რომ ზოგადად სტუდენტობა საზოგადოების ყველაზე აქტიური ფენაა.

ამის გათვალისწინებით შემოთავაზებები სტუდენტების მეტი ჩართულობის შესახებ განსაკუთრებით მნიშვნელოვანი ხდება. “პარტნიორობის ღია მმართველობისთვის” ერთ-ერთი უმთავრესი კომპონენტი სამოქალაქო საზოგადოების ჩართულობაა სახელმწიფო საკითხებში, რაც არანაირად არ ნიშნავს მხოლოდდამხოლოდ არასამთავრობო ორგანიზაციების მონაწილეობას. აუცილებელია, რომ პარტნიორობის სამოქმედო გეგმის შესრულების პროცესში აქტიურად იყოს ჩართული სტუდენტების დიდი რაოდენობა, რომლებიც თავის მხრივ ინფორმაციას მიაწოდებენ თავიანთ ნათესავებს, მეგობრებსა და ნაცნობებს. ანტი-კორუფციული დღის ფარგლებში ჩატარებულ კონკურსში მხოლოდ 20 სტუდენტის მონაწილეობა კი ნათელი ნიშანია იმისა, რომ საქართველოს ჯერ კიდევ ძალიან გრძელი გზა აქვს გასავლელი ამ მიზნის მისაღწევად და აუცილებელია, რომ იუსტიციის სამინისტრომ უფრო დიდი ძალისხმევა გამოიჩინოს ამ თვალსაზრისით.