ავტორი: ნინო ცუხიშვილი (სამართლის ექსპერტი)

საქართველოში მამხილებლის ინსტიტუტის არსებული სამართლებრივი რეგულირება წარმოადგენს საკითხის ფრაგმენტულ მოწესრიგებას „საჯარო სამსახურში ინტერესთა შეუთავსებლობისა და კორუფციის შესახებ“ საქართველოს კანონის ფარგლებში.

ფრაგმენტული მოწესრიგების პრაქტიკის აღმოფხვრის მიზნით, უმჯობესია, მომზადდეს მამხილებლის ინსტიტუტის მომწესრიგებელი დამოუკიდებელი და ამომწურავი საკანონმდებლო აქტი. ასევე, მამხილებლის ინსტიტუტის ეფექტური სამართლებრივი რეგულირების მიზნით,უნდა გადაიხედოს სხვა საკანონმდებლო აქტები, რომელთა მოწესრიგების სფერო უკავშირდება მამხილებლის ინსტიტუტის ეფექტურ ფუნქციონირებას. შესაბამისად, მიგვაჩნია, რომ მიუხედავად იმისა, რომ წარმოდგენილი საკანონმდებლო ცვლილებების პროექტით ხდება  მამხილებლის დაცვის არსებული ნორმების გაუმჯობესება, კანონში ცვლილებების პროექტი ვერ უზრუნველყოფს მამხილებლის ინსტიტუტის ფრაგმენტული მოწესრიგების აღმოფხვრას.

სასურველია, რომ მომზადდეს აღნიშნული უმნიშვნელოვანესი დემოკრატიული ინსტიტუტის მომწესრიგებელი დამოუკიდებელი და ერთიანი საკანონმდებლო აქტი. მნიშვნელოვანია,  დეტალურად განისაზღვროს მამხილებელ სუბიექტთა წრე და მხილების ფარგლები, ასევე მხილების განხორციელების გარე მექანიზმის ამოქმედების პირობები და მამხილებლის დაცვის გარანტიები მის მიერ საჩივრის წარდგენის შესაძლებლობისა და მისთვის მიყენებული ზიანის ანაზღაურების საშუალებების შემუშავების გზით. შესაბამისად, მამხილებლის ინსტიტუტის ფუნქციონირების სამართლებრივი გარანტიების შექმნის გზით მუშაობა უნდა გაგრძელდეს, რათა საკანონმდებლო მოწესრიგებამ უზრუნველყოს მამხილებლის ინსტიტუტის დაცვის სრულყოფილი გარანტიების შექმნა.

/public/upload/pdf/Research/mamxileblis-instituti- kanonproeqtis- analizi(1).pdf