პერსონალურ მონაცემთა დაცვის ინსპექტორის აპარატმა 2013-2016 წლებში 115 ინსპექტირება განახორციელა. შემოწმდა 58 საჯარო უწყება, 57 კერძო ორგანიზაცია და 904 ობიექტი. მისი უწყების მუშაობის შესახებ 3 წლიანი ანგარიში პერსონალური დაცვის ინსპექტორმა არასამთავრობო ორგანიზაციებს წარუდგინა. თამარ ქალდანის თქმით, ყველაზე ბევრჯერ საქართველოს პროკურატურა შემოწმდა, 8-ჯერ კი შინაგან საქმეთა სამინისტრო. სულ გამოვლინდა 108 სამართალდარღვევის ფაქტი, ხოლო კონსულტაციების რიცხვი 3000-ზე მეტს აღწევს. მისი თქმით, ამ ყველაფერთან ერთად კი მნიშვნელოვან გამოწვევად რჩება ინტერნეტ სივრცეში პერსონალურ მონაცემებზე წვდომა.

პერსონალური მონაცემების დაცვის ინსპექტორის ანგარიშით საინფორმაციო საშუალებები განსაკუთრებულად დაინტერესდნენ. აღნიშნული შეხვედრის შესახებ ტელეკომპანია იმედის საინფორმაციო გადაცემა ქრონიკაში სიუჟეტი გავიდა, სადაც თამარ ქალდანთან ერთად პრობლემის გარშემო ინფორმაციის თავისუფლების განვითარების ინსტიტუტის (IDFI) დირექტორი, გიორგი კლდიაშვილიც საუბრობს. იგი აღნიშნავს, რომ გამოწვევები რჩება ფარული მიყურადების საკითხებთან დაკავშირებით. ის აგრეთვე საუბრობს საქართველოში არსებული მიდგომების ევრო-რეგულაციებთან ჰარმონიზაციის შესახებ.

პერსონალურ მონაცემთა დაცვის ინსპექტორის აპარატის მიერ მომზადებულ ანგარიშს მიმოიხილავს I არხი საინფორმაციო გადაცემაში მოამბე. მუშაობის სამი წლის შედეგები განიხილეს კურიერში გასულ სიუჟეტში. აღნიშნული შეხვედრისა და სამომავლო პერსპექტივების შესახებ მაესტროს კონტაქტიც საუბრობს.

პერსონალური მონაცემების აპარატის მიერ მომზადებულ მასალას ვრცელი სიუჟეტი მიუძღვნა ტელეკომპანია ტაბულამ. გიორგი კლდიაშვილი აღნიშნავს, რომ ‘’მნიშვნელოვანია სამომავლო რეფორმები, რომელიც დაგეგმილია, კერძოდ ინფორმაციის თავისუფლების კუთხით.’’ შეხვედრის შესახებ მასალას აქვეყნებს ასევე ტელეკომპანია ჯიდიესი, გადაცემაში 20/30.