ვებ-გვერდის პრეზენტაციაზე ჟურნალისტებთან და მედია ექსპერტებთან ერთად პოლიტიკური პარტიებისა და სახელმწიფო სტრუქტურების წარმომადგენლები იყვნენ მოწვეული.
როგორც ორგანიზაციის წარმომადგენლები ამბობენ, საჯარო ინფორმაციის სახელმწიფო უწყებებიდან გამოთხოვას და ვებ-გვერდზე ატვირთვას ერთადერთი მიზანი აქვს - მომავალში უფრო გამჭვირვალე გახადოს საჯარო უწყებების მუშაობა.
ვებ-პორტალზე პერმანენტულად აიტვირთება ინფორმაცია საჯარო უწყებების ბიუჯეტების, პრემიების, სახელფასო ფონდების, საშტატო ერთეულების, ავტოპარკისა და სატელეფონო, ასევე სამივლინებო ხარჯები, საჯარო დაწესებულებების უძრავი ქონება.
დღეისთვის მიღებული პასუხების ანალიზით ირკვევა, რომ ყველაზე დახურული სტრუქტურები პრეზიდენტის ადმინისტრაცია, შინაგან საქმეთა სამინისტრო და ლტოლვილთა და განსახლების სამინისტროა.
ყველაზე ოპერატიულად და ამომწურავად კი საჯარო ინფორმაცია რეინტეგრაციის სამინისტრომ და სოფლის მეურნეობის სამინისტრომ გასცა.
მომავალში IDFI არ აპირებს საინფორმაციო ვებ-პორტალისთვის მიღებული მასალის ანალიზს, თუმცა დღევანდელ პრეზენტაციაზე მაინც წარმოადგინეს რამდენიმე მნიშვნელოვანი საკითხი. ერთ-ერთი ასეთი საკითხია სამინისტროებში სახლფასო ფონდებისა და პრემიების შეფარდება, კონკრეტული მინისტრებისთვის გამოყოფილი ულიმიტო საწვავვის ხარჯები და ასტრონომიული ხარჯები საჯარო პირების პირადი სატელეფონო ხარჯების ასანაზღაურებლად.
დღეიდან www.opendata.ge ღიაა ნებისმიერი მოქალაქისთვის და მომავალშიც ყველას შეუძლია გახდეს ამ საიტის კონტრიბუტორი, თუმცა ვებ-გვერდის ადმინისტრაცია პასუხისმგებლობას იღებს არაოფიციალური წყაროებიდან მიღებული ინფორმაციის გადამოწმებაზე.
არასამთავრობო ორგანიზაცია "ინფორმაციის თავისუფლების განვითარების ინსტიტუტი"www.idfi.ge სამოქალაქო სექტორში აქტიურ მოქმედებას სწორედ ახალი ვებ-პორტალით იწყებს. თუმცა ორგანიზაცია წელიწადზე მეტია მუშაობს და ქართულ არასამთავრობო სექტორში გავლენიანი პარტნიორებიც შეიძინა. ფონდი "ღია საზოგადოება საქართველოს" ფინანსური მხარდაჭერით, ახალგაზრდა იურისტთა ასოციაციისა და მწვანე ალტერნატივასთან თანამშრომლობით IDFI რამდენიმე პროექტის განხორციელებას აპირებს.
