თბილისის საკრებულოს თავმჯდომარემ ათი თვის განმავლობაში 18 684 ლარი პრემია აიღო

ინფორმაციის თავისუფლების განვითარების ინსტიტუტი თბილისის საკრებულოს ხარჯების შესახებ ინფორმაციას აქვეყნებს.

თბილისის საკრებულოს მიერ IDFI-სთვის მიწოდებულ დოკუმენტებში აღნიშნულია:

2013 წლის ბიუჯეტის უკანასკნელი ცვლილებით, თბილისის საკრებულოში დასაქმებული 210 პირის ანაზღაურებისათვის წლიურად 4 585 500 ლარია გამოყოფილი. აღნიშნული თანხიდან 2013 წლის საწყისი 10 თვის განმავლობაში (იანვარი-ოქტომბერი) ქალაქ თბილისის საკრებულოს წევრებზე და აპარატის თანამშრომლებზე ერთობლივად გაცემული პრემიების საერთო რაოდენობამ 1 707 631 ლარი შეადგინა, საიდანაც საკრებულოს წევრებზე 439 276 ლარი, ხოლო აპარატის თანამშრომლებზე 1 268 355 ლარი გაცემული.

2013 წლის იანვარი-ივლისი პერიოდში პრემია საკრებულოს მხოლოდ 23 წევრზე გაიცემოდა, საკრებულოს ახალი თავმჯდომარის (ირაკლი შიხიაშვილის) დანიშვნის შემდგომ, აგვისტოდან ოქტომბრის თვის ჩათვლით, ყოველთვიურად პრემია საკრებულოს 31 წევრზე გაიცემოდა.

2013 წლის საწყისი 10 თვის განმავლობაში თბილისის საკრებულოს თავმჯდომარემ ირაკლი შიხიაშვილმა 18 684 ლარი მიიღო, საკრებულოს წევრებიდან პრემიების ყველაზე დიდი ოდენობა - 19 095 ლარი კი ჯაბა სამუშიამ და გიორგი ტყემალაძემ მიიღეს.

იხილეთ ბმული