„საპროცესო შეთანხმების საფუძველზე გადარიცხული თანხების შესახებ ინფორმაცია ხელმისაწვდომი უნდა იყოს“ - IDFI
08/11/2013
ინფორმაციის თავისუფლების განვითარების ინსტიტუტი (IDFI) აღსრულების ეროვნულ ბიუროს მოუწოდებს ხელმისაწვდომი გახადოს საპროცესო შეთანხმების საფუძველზე სახელმწიფო ბიუჯეტში გადარიცხული თანხების შესახებ ინფორმაცია.
IDFI-ის 8 ნოემბერს გამოქვეყნებულ ბლოგში აღნიშნულია, რომ აღსრულების ეროვნული ბიუროს სტატისტიკის სამსახურის მიერ მონაცემთა აღრიცხვა 2013 წლიდან გადავიდა განსხვავებულ სისტემაზე. რაც იმას ნიშნავს, რომ საპროცესო შეთანხმების საფუძველზე გადარიცხული თანხების ოდენობა არ გამოიყოფა სისხლის სამართლის საქმეებზე დაკისრებული სხვა სახდელებისგან. ამის გამო ორგანიზაციამ აღსრულების ეროვნული ბიუროდან ვერ მიიღო ინფორმაცია 2013 წელს საპროცესო შეთანხმების საფუძველზე სახელმწიფო ბიუჯეტში გადარიცხული თანხების შესახებ. ამ ინფორმაციის მოთხოვნით IDFI –მ სსიპ აღსრულების ეროვნულ ბიუროს 2013 წლის 25 სექტემბერს მიმართა.
„ როგორც მიღებული დოკუმენტაციიდან ირკვევა 2013 წლის 9 თვის განმავლობაში (1 იანვარი – 25 სექტემბერი) სისხლის სამართლის საქმეებზე დაკისრებული ჯარიმების, სახელმწიფოსთვის მიყენებული ზიანის, გირაოსა და საპროცესო შეთანხმების საფუძველზე სახელმწიფო ბიუჯეტში გადარიცხული თანხების მთლიანი ოდენობა შეადგენს 54 722 173 ლარს. რაც შეეხება უშუალოდ საპროცესო შეთანხმების საფუძველზე გადარიცხულ თანხების ოდენობას, მოწოდებულ დოკუმენტაციაში აღნიშნულია, რომ სსიპ-აღსრულების ეროვნული ბიურო არ აწარმოებს განცალკევებით ამ მონაცემების აღრიცხვას“, - განმარტებულია IDFI-ის განცხადებაში. .
თუმცა, 2013 წლის მონაცემებისგან განსხვავებით IDFI-მ აღსრულების ეროვნული ბიუროდან მიიღო ინფორმაცია 2009-2012 წლებში საპროცესო შეთანხმების საფუძველზე სახელმწიფო ბიუჯეტში გადარიცხული თანხების შესახებ.
IDFI მოუწოდებს აღსრულების ეროვნული ბიუროს, რომ აღადგინოს აღნიშნული მონაცემების განცალკევებით აღრიცხვა, რათა საზოგადოების მხრიდან ეს ფაქტი აღქმული არ იქნას როგორც მონაცემების დაფარვის მცდელობა და გადაიჭრას საპროცესო შეთანხმებების შედეგად ბიუჯეტში გადარიცხული თანხების გაუმჭვირვალობის პრობლემა.
.png)
სიახლეების გამოწერა
