IDFI: პოლიციის მიერ მოქალაქეებზე დაკისრებული ჯარიის მაჩვენებელი 70%-ით გაიზარდა
თავისუფლების განვითარების ინსტიტუტის (IDFI) ინფორმაციით, საპატრულო პოლიციის მიერ მოქალაქეებზე დაკისრებული ჯარიმის მაჩვენებელი 70%-ით გაიზარდა.
ამის შესახებ IDFI-ის მიერ გავრცელებულ განცხადებაშია ნათქვამი.
განცხადების თანახმად, IDFI-მ შინაგან საქმეთა სამინისტროდან საპატრულო პოლიციის დეპარტამენტის მიერ 2013 წლის პირველ 6 თვეში ადმინისტრაციულ სამართალდარღვევათა გამო ბიუჯეტის სასარგებლოდ დაკისრებულ ჯარიმათა საერთო ოდენობის შესახებ ინფორმაცია მიიღო.
„როგორც ირკვევა, დროის აღნინშულ მონაკვეთში საპატრულო პოლიციის დეპარტამენტის მიერ მოქალაქეებისთვის დაკისრებულია 31 106 828 ლარის ოდენობის ჯარიმა. 2011 და 2012 წლების შესაბამისი პერიოდების ანალოგიური ინფორმაცია კი ასეთია: 2011 წლის 6 თვე - 21 134 952 ლარი, 2012 წლის 6 თვე - 18 276 641 ლარი", - ნათქვამია განცხადებაში.
ორგანიზაციის ინფორმაციით, 2013 წლის პირველი 6 თვის განმავლობაში, საპატრულო პოლიციის მიერ ადმინისტრაციულ სამართალდარღვევათა გამო დაკისრებულ ჯარიმათა რაოდენობა 2011 წლის ანალოგიურ პერიოდთან შედარებით 9 971 876 ლარითაა (47,2%-ით) გაზრდილი, ხოლო 2012 წლის ანალოგიურ პერიოდთან შედარებით 12 830 187 ლარით (70% -ით).
სიახლეების გამოწერა
