პრობაციის ეროვნული სააგენტო ყველაზე პროგრესირებად საჯარო დაწესებულებად დასახელდა
12.09.2013
პრობაციის ეროვნული სააგენტო საჯარო დაწესებულებებს შორის, ინფორმაციის გამჭვირვალობის კუთხით ყველაზე პროგრესირებად დაწესებულებად დასახელდა.
ინფორმაციის თავისუფლების განვითარების ინსტიტუტის (IDFI) მიერ ჩატარებული კვლევის შედეგების პრეზენტაცია დღეს სასტუმრო "რედისონში" გაიმართა. ღონისძიება საქართველოს პრემიერ-მინისტრმა ბიძინა ივანიშვილმა გახსნა. პრეზენტაციას, საჯარო დაწესებულებების, საერთაშორისო ორგანიზაციების, დიპლომატიური კორპუსის, მედიისა და არასამთავრობო ორგანიზაციების წარმომადგენლებთან ერთად, სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი დაესწრო.
პრეზენტაციაზე 2012 წლის ივლისიდან 2013 წლის ივნისამდე პერიოდში ყველაზე გამჭირვალე და ყველაზე დახურული საჯარო დაწესებულებების რეიტინგი და სხვადასხვა სტატისტიკური მონაცემები გამოქვეყნდა.
ღონისძიებაზე აღინიშნა, რომ პრობაციის ეროვნულმა სააგენტომ სრულყოფილი პასუხების გაცემის პარამეტრების მიხედვით, 2012-2013 წლებში 94%-იან პროგრესს მიაღწია და შესაბამისად, ამ ნომინაციაში პირველ ადგილზე გავიდა.
ინფორმაციის თავისუფლების განვითარების ინსტიტუტის წარმომადგენლებმა სასტუმრო "რედისონში" პრობაციის ეროვნულ სააგენტოს ამ წარმატების დამადასტურებელი დიპლომი გადასცეს.
სიახლეების გამოწერა
