რეგიონული განვითარებისა და ინფრასტრუქტურის სამინისტრო ერთ-ერთ გამჭვირვალე უწყებად დასახელდა
მარიამ ხუნაშვილი
12.09.2013
საქართველოს რეგიონული განვითარებისა და ინფრასტრუქტურის სამინისტრო ერთ-ერთ გამჭვირვალე უწყებად დასახელდა, რის გამოც სპეციალური ჯილდო - „2012-2013 წლებში საჯარო ინფორმაციის ხელმისაწვდომობის უზრუნველყოფისთვის" - გადაეცა.
ინფორმაციის თავისუფლების განვითარების ინსტიტუტმა (IDFI) დღეს 2012-2013წლებში საჯარო ინფორმაციის ხელმისაწვდომობის უზრუნველყოფისთვის რამდენიმე საჯარო უწყება დააჯილდოვა, მათ შორის, ჯილდო საქართველოს რეგიონული განვითარებისა და ინფრასტრუქტურის სამინისტროს, როგორც ერთ-ერთ ყველაზე გამჭვირვალე უწყებას, გადაეცა.
„ჩვენ უწყებაში კარი ფართოდ გავაღეთ ნებისმიერი იმ ადამიანისთვის, რომელსაც აინტერესებს საჯარო ინფორმაცია", - ამის შესახებ რეგიონული განვითარებისა და ინფრასტრუქტურის მინისტრმა, დავით ნარმანიამ ჟურნალისტებს განუცხადა.
მისი თქმით, საჯარო ინფორმაციის გაცემის არც ერთი მოთხოვნა სამინისტროს ახალი ხელმძღვანელობის პერიოდში რეაგირების გარეშე არ დაუტოვებია.
„უპირველეს ყოვლისა, უნდა ითქვას, რომ ჩვენს უწყებაში რაც გავაკეთეთ მოსვლის დროს, იყო ის, რომ კარი ფართოდ გავაღეთ ნებისმიერი იმ ადამიანისთვის,რომელსაც აინტერესებს საჯარო ინფორმაცია. ძალიან ბევრი ინფორმაცია, რაც ადრე არ იდო ვებ-გვერდზე, დავდეთ. ეს არის: დეტალური ბიუჯეტი, დეტალური ანგარიშები, პრეზენტაციები, რასაც ჩვენ ვაკეთებთ, არის ღია და საჯარო. რეაგირება ხდება ნებისმიერ შემოსულ განცხადებაზე", - აღნიშნა დავით ნარმანიამ.
პრეზენტაციას საქართველოს პრემიერ-მინისტრი, მთავრობის სხვა წარმომადგენლები, არასამთავრობო, საერთაშორისო და დიპლომატიური კორპუსის წარმომადგენლები ესწრებოდნენ.
სიახლეების გამოწერა
