30 მაისს IDFI-მ გამოაქვეყნა კვლევა მასწავლებელთა პროფესიული განვითარების ცენტრის მიერ მისი პროგრამის - „ასწავლე და ისწავლე საქართველოსთან ერთად“ მონაწილეებისთვის შეძენილი ავიაბილეთების შესახებ. აღმოჩნდა, რომ 2015 წელს ტენდერის საშუალებით ცენტრმა 39,000 ლარის ღირებულების 11 ცალმხრივი ბილეთის შესაძენად 62,000 ლარი დახარჯა. გარდა ამისა, 2013-2015 წლებში ბილეთების შესაძენად გამოცხადებული ცხრა ტენდერის შედეგად დახარჯული 571,714 ლარიც გადამეტებულ ხარჯს შეიცავდა.

კვლევამ მედიის დიდი ინტერესი გამოიწვია. მის შესახებ სიუჟეტები მოამზადეს ტელეკომპანია რუსთავი 2-მა _ გადაცემაში ბიზნეს კურიერი და საზოგადოებრივი მაუწყებლის პირველმა არხმა. ორივე სიუჟეტში IDFI-ის კარგი მმართველობის პროგრამის კოორდინატორმა საბა ბუაძემ ისაუბრა. რუსთავი 2-ის დილის ეთერში მან განაცხადა, რომ „კონკრეტულად ვერ ვიტყვით, კორუფციული გარიგებაა, თუ სამართალდარღვევა. ჩვენი რეკომენდაციაა, რომ ამ საკითხით დაინტერესდეს სახელმწიფო შესყიდვების სააგენტო“.

პირველი არხის ეთერში კი მან განმარტა, რომ „ბილეთები გაცილებით უფრო ნაკლები ღირს, ვიდრე გადახდილი აქვს სახელმწიფოს. ერთი მხრივ, შეიძლება პრობლემა გვქონდეს შესყიდვის ცუდ, გაუმართავ პროცედურასთან და, მეორე მხრივ, პრობლემა შეიძლება იყოს მომწოდებლის არაკეთილსინდისიერება“.

IDFI-ის კვლევის შესახებ ისაუბრეს რადიო პირველმა და რადიო მაესტრომ.

ბეჭდური მედიიდან კვლევას საკმაოდ ვრცლად გამოეხმაურა გაზეთი მესინჯერი.

კვლევის მოკლე ვერსია ასევე გამოაქვეყნეს საინფორმაციო პორტალებმა www.ick.ge და www.ipress.ge.