2022 წლის 31 იანვარს, ინფორმაციის თავისუფლების განვითარების ინსტიტუტმა (IDFI), პროექტის „საჯარო და კერძო სექტორებს შორის დიალოგის ხელშეწყობა საქართველოში მონიტორინგისა და ცნობიერების ამაღლების გზით“ ფარგლებში, გამართა საინფორმაციო შეხვედრა ოზურგეთის, ზუგდიდის და ბათუმის საკრებულოს წარმომადგენლებთან. 

პროექტის ფარგლებში, IDFI შეაფასებს მუნიციპალიტეტებში რეგულაციების შემუშავების პროცესში საჯარო-კერძო დიალოგის ხარისხს. გარდა ამისა, პროექტი მიზნად ისახავს შერჩეულ მუნიციპალიტეტებში საკრებულოს წევრების ცნობიერების ამაღლებას დიალოგის მნიშვნელობასა და ხარისხის შეფასების მექანიზმის თაობაზე.

შეხვედრის მონაწილეებმა მიიღეს ინფორმაცია პროექტის მიზნებისა და ხარისხის შეფასების მეთოდოლოგიის თაობაზე. საქართველოს ეროვნული ბანკისა და ინვესტორთა საბჭოს წარმომადგენლები შეხვედრის მონაწილეებს ესაუბრნენ საჯარო-კერძო დიალოგის საუკეთესო პრაქტიკისა და კერძო სექტორის ჩართულობის მნიშვნელობაზე, საკანონმდებლო აქტების შემუშავებისას. შეხვედრის დასასრულს კი საკრებულოს წარმომადგენლებმა ისაუბრეს ფაქტორებზე, რომლებიც ხელს უშლის მუნიციპალიტეტებში საჯარო-კერძო დიალოგის მაღალი ხარისხით წარმართვას. 

შეხვედრას უძღვებოდა IDFI-ს ეკონომიკური და სოციალური პოლიტიკის მიმართულების ხელმძღვანელი, გივი ადეიშვილი და USAID-ის ეკონომიკური მმართველობის პროგრამის ხელმძღვანელი  ქალბატონი ნატალია ბერუაშვილი.

საინფორმაციო შეხვედრა USAID-ის ეკონომიკური მმართველობის პროგრამის მხარდაჭერით განხორციელდა.