2025 წლის 18 მარტს, ეუთო-ს ადამიანური განზომილების დამატებითი შეხვედრის ფარგლებში, გაიმართა პარალელური ღონისძიება, რომელშიც მონაწილეობდნენ IDFI-ს, საია-ს და “უფლებები საქართველოს” წარმომადგენლები.

შეხვედრის ფარგლებში მომხსენებლებმა ისაუბრეს საქართველოში, მედიის თავისუფლების მხრივ არსებულ საგანგაშო ვითარებაზე, სისტემური რეპრესიის ფორმებზე, რომლებსაც “ქართული ოცნება” იყენებს კრიტიკული მედიის წინააღმდეგ და გარემოებებზე, რომლებიც ავლენს ინსტიტუტების მიტაცების მასშტაბს. 

შეხვედრის მიმდინარეობისას, მედიის წარმომადგენლების წინააღმდეგ ჩადენილი დანაშაულების გამოუძიებლობას და  ძალადობრივი ქმედებების დაუსჯელობის ხელშეწყობას განსაკუთრებული ყურადღება დაეთმო. ამავდროულად, ხაზი გაესვა იმ გარემოებას, რომ ეროვნულ დონეზე არ არსებობს სახელმწიფო ინსტიტუტი, რომელიც დგამს ქმედით ნაბიჯებს სისტემური რეპრესიის სამიზნე სუბიექტების უფლებების დასაცავად. 

ღონისძიებას მოდერაციას უწევდა „ადამიანის უფლებათა სახლების ფონდის“ ადვოკატირებისა და ჟენევის ოფისის ხელმძღვანელი, დეივ ელსროუდი.