ინფორმაციის თავისუფლების განვითარების ინსტიტუტი (IDFI) საჯარო ინფორმაციაზე ხელმისაწვდომობის გაუმჯობესების მიზნით ახორციელებს პროექტს, რომლის ფარგლებშიც სთავაზობს ჟურნალისტებსა და მედიის წარმომადგენლებს სრულ სამართლებრივ დახმარებას ინფორმაციის თავისუფლებასთან დაკავშირებულ საკითხებზე.

სამართლებრივი დახმარება არის სრულიად უფასო და მოიცავს შემდეგ მიმართულებებს: 

- პროფესიული კონსულტაცია ნებისმიერ საკითხზე, რომელიც ეხება ინფორმაციის თავისუფლებას;

- საჯარო ინფორმაციის გამოთხოვასთან დაკავშირებული პროცედურების განხორციელება, რაც გულისხმობს მოთხოვნების ფორმულირებას, განცხადებების მომზადებას და მათ გაგზავნას, მიღებული ინფორმაციის დაინტერესებული პირ(ებ)ისადმი მოწოდებას;

- ადმინისტრაციულ საჩივართან დაკავშირებულ პროცედურებში მონაწილეობა, რაც გულისხმობს საჯარო დაწესებულების დაგვიანებული ან არასრული პასუხის, ინფორმაციის მოუწოდებლობის ან/და უკანონო სამართლებრივი აქტის გასაჩივრებას. IDFI მზადაა ჩაერთოს ადმინისტრაციული წესით საჩივრის განხილვის პროცესში და განახორციელოს წარმომადგენლობითი უფლებამოსილება;

- სასამართლოსთვის მიმართვა და ადმინისტრაციული დავის წარმოება - ადმინისტრაციული სარჩელების მომზადება, სასამართლოში მათი შეტანა და საქმეზე სრული წარმომადგენლობითი უფლებამოსილების განხორციელება. საჭიროების შემთხვევაში, IDFI დაფარავს სახელმწიფო ბაჟს.

პროექტის ძირითადი მიზანი საჯარო ინფორმაციაზე მედიის წარმომადგენლების ხელმისაწვდომობის გაზრდაა და სწორედ ისინი წარმოადგენენ ძირითად ბენეფიციარებს.

ჩვენს იურისტებთან დაკავშირება შესაძლებელია ელექტრონული ფოსტის, Signal Private Messenger,  WhatsApp და Telegram-ის გამოყენებით.

Signal/WhatsApp/Mobile: +995 511 24 70 92

Email: LPA@IDFI.GE

დამატებითი ინფორმაციისთვის ეწვიეთ ვებგვერდს:

www.lpaprogram.com 

პროექტი ხორციელდება „ღია საზოგადოების ფონდის“ მხარდაჭერით