2023 წლის 25 ნოემბერს ბოლნისში და 9 დეკემბერს მარნეულის რაიონის სოფელ აღმამედლოში ინფორმაციის თავისუფლების განვითარების ინსტიტუტმა (IDFI), NATO Public Diplomacy Programmes/Division-ის დაფინანსებული პროექტის - „ეთნიკურ უმცირესობებში დეზინფორმაციასთან საბრძოლველად ბარიერების დაძლევა“  ფარგლებში, საინფორმაციო შეხვედრები გამართა.

ტრენინგებს უძღვებოდა  მოწვეული ტრენერი ფაგან აბასოვი, რომელმაც ისაუბრა ნატო-ს დაარსების ისტორიასა და მის ძირითად პრინციპებსა და მიზნებზე, ნატო-ს როლზე კონფლიქტების მოგვარებაში, ჯგუფური სამუშაოს ფარგლებში ყურადღება გაამახვილა ნატო-ში გაწევრიანების დადებით მხარეებზე და რეგიონში გავრცელებული დეზინფორმაციული ნარატივების გაბათილებაზე.

სატრენინგო სესიებზე მოწვეულმა ტრენერმა, ნოდარ ქირიამ ისაუბრა ინტერნეტსივრცეში დეზინფორმაციის მრავალფეროვნებაზე, მისი გადამოწმების მეთოდებსა და ამოცნობის გზებზე. ტრენინგის მეორე ნაწილში წარმოადგინა  სხვადასხვა მარტივი და პრაქტიკული  ონლაინ პლატფორმა, რომელთა საშუალებითაც კონტენტის პირველწყაროს მოძიება და ნებისმიერი სიახლის გადამოწმებაა  შესაძლებელი. 

პროექტი „ეთნიკურ უმცირესობებში დეზინფორმაციასთან საბრძოლველად ბარიერების დაძლევა“   მიზნად ისახავს საქართველოს რეგიონებში მცხოვრები ეთნიკური უმცირესობების თემებში ნატოს საწინააღმდეგო განწყობისა და ცოდნის ნაკლებობის აღმოფხვრას; უსაფრთხოების გარანტიების გაცნობას, რომელსაც საქართველო მიიღებს ნატოს წევრობის შემთხვევაში; ნატოს და მისი მისიის შესახებ ცნობიერების ამაღლებას საქართველოში, ეთნიკური უმცირესობების თემების მდგრადობის ხელშეწყობას დეზინფორმაციის მიმართ.

ღონისძიების მონაწილეებს სატრენინგო სესიის დასრულების შემდეგ გადაეცათ ორენოვანი სერტიფიკატები.

ღონისძიება განხორციელდა NATO Public Diplomacy Programmes/Division-ის ფინანსური მხარდაჭერით.