საქართველოს მთავრობის 2013 წლის 26 აგვისტოს №219 დადგენილების ,,საჯარო ინფორმაციის ელექტრონული ფორმით მოთხოვნისა და პროაქტიულად გამოქვეყნების შესახებ“ ძალაში შესვლის დღიდან, ინსტიტუტი აქტიურად მოუწოდებს საჯარო დაწესებულებებს არ შემოიფარგლონ მხოლოდ იმ მინიმალური კონკრეტული ინფორმაციის საკუთარ ვებ-გვერდზე განთავსებით, რომელიც დააკმაყოფილებს მთავრობის მიერ დადგენილ მოთხოვნებს.

საჯარო ინფორმაციის პროაქტიულად გამოქვეყნების დადგენილი სტანდარტების მიხედვით, ადმინისტრაციული ორგანო უფლებამოსილია, საკუთარი საქმიანობისა და კომპეტენციის ფარგლებში დამატებით, პროაქტიულად გამოაქვეყნოს საზოგადოებრივი ინტერესის შემცველი სხვა საჯარო ინფორმაცია. ინსტიტუტის შეფასებით ადმინისტრაციული ორგანოების მიერ ვებ-გვერდზე უნდა განთავსდეს ყველა ის ფინანსური თუ სხვა საჯარო დოკუმენტი, რომელზეც მაღალი საზოგადოებრივი ინტერესი არსებობს.

აღსანიშნავია ის ფაქტი, რომ საქართველოს ფინანსთა სამინისტრომ საკუთარ ვებ-გვერდზე www.mof.ge განათავსა განყოფილება „მიიღე მონაწილეობა გამოკითხვაში“, რომელიც მომხმარებელს საშუალებას აძლევს გაუზიაროს საკუთარი შეხედულება სამინისტროს და მიუთითოს თუ დამატებით რა სახის ინფორმაციის ხილვა სურს სამინისტროს ვებ–გვერდზე.

IDFI მიესალმება ფინანსთა სამინისტროს გადაწყვეტილებას და მოუწოდებს ყველა სხვა საჯარო დაწესებულებას, გაიზიაროს აღნიშნული სამინისტროს მიერ შემოთავაზებული სტანდარტი, რომელიც გულისხმობს პროაქტიულად გამოსაქვეყნებელი ინფორმაციის დამატებითი ნუსხის შედგენაში მოქალაქეთა ჩართულობას. ამასთან, ინსტიტუტს მნიშვნელოვნად მიაჩნია დაწესებულებებმა საკუთარ ვებ-გვერდზე განათავსონ ყველა ის საჯარო ინფორმაცია, რომელიც ყველაზე ხშირად იქნა გამოთხოვნილი მათი უწყებებიდან წლის განმავლობაში. აღნიშნული შესაძლებლობით სარგებლობა, მაღალი ალბათობით, ერთის მხრივ, შეამცირებს ბეჭდური სახით საჯარო ინფორმაციის მოთხოვნის საჭიროებას, ხოლო, მეორეს მხრივ, მნიშვნელოვნად გაზრდის საჯარო დაწესებულებების გამჭვირვალობისა და ანგარიშვალდებულების ხარისხს.