ინფორმაციის თავისუფლების განვითარების ინსტიტუტი (IDFI) აქვეყნებს სხვადასხვა საჯარო დაწესებულებაში საჯარო ინფორმაციის ხელმისაწვდომობის უზრუნველყოფასა და პროაქტიულ გამოქვეყნებაზე პასუხისმგებელ პირთა მონაცემთა ბაზას.

ორგანიზაციის ცნობით, აღნიშნულ ბაზაში მოცემულია ორასზე მეტ საჯარო დაწესებულებაში, საჯარო ინფორმაციის გაცემაზე პასუხისმგებელი პირის სახელი, გვარი, თანამდებობა, ტელეფონის ნომერი და ელ. ფოსტა. გარდა ამისა, ბაზაში მითითებულია საჯარო დაწესებულებების მისამართები, ვებ-გვერდები და ლოგოები (არსებობის შემთხვევაში).

ინფორმაცია ორგანიზებულია სამ ძირითად კატეგორიაში, რაც ამარტივებს ძებნის პროცესს. ეს კატეგორიებია:

- პრეზიდენტის ადმინისტრაცია, მთავრობის კანცელარია, პარლამენტი და მათ დაქვემდებარებაში არსებული სსიპ-ები, დამოუკიდებელი ორგანოები;

- სამნისტროები, მათ დაქვემდებარებაში არსებული სსიპ-ები და საქვეუწყებო დააწესებულებები;

- საქართველოს იუსტიციის უმაღლესი საბჭო, იუსტიციის უმაღლესი სკოლა, სასამართლოები.

IDFI სისტემატურად ანახლებს და სრულყოფს საჯარო ინფორმაციის ხელმისაწვდომობის უზრუნველყოფასა და პროაქტიულ გამოქვეყნებაზე პასუხისმგებელ პირთა მონაცემთა ბაზას.

IDFI-ს წარმომადგენლები შენიშნავენ, რომ საჯარო ინფორმაციის ელექტრონულად მოთხოვნის სტანდარტი არ არის განსაზღვრული ზოგადი ადმინისტრაციული კოდექსით, კანონში არსებული ჩანაწერით ამ სტანდარტს ყველა უწყება შეიმუშავებს ინდივიდუალურად, რის გამოც არ არსებობს ერთიანი პრაქტიკა.

"ამჟამად ჩვენ ვმუშაობთ ინფორმაციის თავისუფლების შესახებ ახალ კანონზე, რომლის მიღების შემთხვევაში ინფორმაციის ელექტრონულად გამოთხოვა შესაძლებელი გახდება", აცხადებენ ინფორმაციის თავისუფლების განვითარების ინსტიტუტში.

იხილეთ ბმული