იმ სამინისტროებიდან, რომელთა ხელმძღვანელებიც დღეს თანამდებობიდან გაათავისუფლეს, ინფორმაციის ხელმისაწვდომობის მაჩვენებლით კულტურისა და ძეგლთა დაცვის სამინისტროს ყველაზე დაბალი შეფასება აქვს. ინფორმაციის თავისუფლების განვითარების ინსტიტუტის (IDFI) მიერ გავრცელებული განცხადების თანახმად, ამ სამინისტროში ინფორმაციის ხელმისაწვდომობის ხარისხი 67,6%-ს უდრის.

შედარებით მაღალია დიასპორის საკითხებში სახელმწიფო მინისტრის აპარატის ინფორმაციის ხელმისაწვდომობის მაჩვენებელი, იგი 74,6%-ს შეადგენს.

სასჯელაღსრულებისა და პრობაციის სამინისტროს ინფორმაციაზე ხელმისაწვდომობის მაჩვენებელი 90,8%-ს უდრის. ხოლო სოფლის მეურნეობის სამინისტროსი - 99,7%-ს.

ინფორმაციის ხელმისაწვდომობის 100%-იანი მაჩვენებელი აქვს - გარემოსა და ბუნებრივი რესურსების დაცვის სამინისტროს, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს, რეგიონული განვითარებისა და ინფრასტრუქტურის სამინისტროს.

"გვსურს აღვნიშნოთ, რომ თანამდებობიდან განთავისუფლებული მინისტრების უმეტესობის ხელმძღვანელობით სამინისტროებმა მნიშვნელოვანი პროგრესი განიცადეს ინფორმაციის ხელმისაწვდომობისა და გამჭვირვალობის თვალსაზრისით. მათ შორის განსაკუთრებით აღსანიშნავია გარემოსა და ბუნებრივი რესურსების დაცვის სამინისტრო, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო, რეგიონული განვითარებისა და ინფრასტრუქტურის სამინისტრო და სოფლის მეურნეობის სამინისტრო, რომლებიც, ინსტიტუტის შეფასებით, 2013-2014 წლებში იკავებდნენ მოწინავე პოზიციებს საქართველოს საჯარო დაწესებულებების რეიტინგში ინფორმაციის ხელმისაწვდომობის პრაქტიკის მიხედვით",- აღნიშნულია IDFI-ის განცხადებაში.

IDFI იმედს გამოთქვამს, რომ იმ ახალი მინისტრებისთვის, რომლებიც აღნიშნული უწყებების ხელმძღვანელებად დაინიშნებიან, გამჭვირვალე და ღია მმართველობა მათი საქმიანობის ერთ-ერთი მთავარი პრიორიტეტი იქნება.

იხილეთ ბმული