2015 წლის 15 აგვისტოს ინფორმაციის თავისუფლების განვითარების ინსტიტუტის (IDFI) დირექტორმა, გიორგი კლდიაშვილმა და ტელეკომუნიკაციების მიმართულების ხელმძღვანელმა უჩა სეთურმა, გორში, 2008 წლის რუსეთ-საქართველოს ომის შედეგად დაზარალებული სოფიო მურადოვა მოინახულეს, რომელსაც ციფრული სიგნალის მიმღები მოწყობილობა, „სეტ-ტოპ-ბოქსი“ და მიმღები ანტენა გადასცეს და დაუმონტაჟეს.

რუსული აგრესიის შედეგად, 2008 წლის 8 აგვისტოს, სოფიო მურადოვას ჭურვის ნამსხვრევებმა ორივე კიდური დაუზიანა. მას შემდეგ 13 ოპერაციის გაკეთება დასჭირდა და 7 წელია სიარული არ შეუძლია.

იმის გამო, რომ სოფიო მურადოვას სახელმწიფომ სოციალურად დაუცველის სტატუსი მოუხსნა, მისთვის არც უფასო სეტ-ტოპ-ბოქსი გადაუციათ. ინფორმაცია იმის შესახებ, რომ სოფიო მურადოვას სეტ-ტოპ-ბოქსი არ ჰქონდა და ციფრულ ტელევიზიას ვერ უყურებდა, IDFI-მ 7 აგვისტოს რუსთავი 2-ის ეთერში გასული სიუჟეტიდან შეიტყო.

IDFI ბოლო 4 წელია აქტიურ ადვოკატირებასა და მხარდაჭერას უწევს ციფრულ მაუწყებელზე გადასვლის პროცესს. ორგანიზაცია აქტიურად არის ჩართული სახელმწიფო სტრატეგიის შემუშავებისა და რეალიზაციის მონიტორინგის პროცესში. აქტივობის ერთ-ერთი მნიშვნელოვანი მიმართულება ითვალისწინებს ციფრულ მაუწყებლობაზე გადასვლის პროცესში სეთ-ტოპ-ბოქსების საცალო ბაზარზე არსებული მდგომარეობისა და მომხმარებელთა პრობლემების კონტროლს. ორგანიზაცია ახორციელებს პროექტს „ციფრულ მაუწყებლობაზე გადასვლის მხარდაჭერა და მონიტორინგი საქართველოში“ „ფონდ ღია საზოგადოება საქართველოს" მხარდაჭერით.