9 სექტემბერს, 18-მა არასამთავრობო ორგანიზაციამ ხელი მოაწერა გამჭვირვალობის დეკლარაციას, რომლის მიხედვითაც თითოეულმა მათგანმა პასუხისმგებლობა აიღო, პერიოდულად, როგორც საკუთარ ვებგვერდებზე, ასევე საერთო ონლაინ პლატფორმებზე, გამოაქვეყნოს ინფორმაცია დაგეგმილი და განხორციელებული საქმიანობების, განხორციელების ვადების, დონორების და დაფინანსების რაოდენობის შესახებ.

დეკლარაციაზე ხელმოწერა არის ნებაყოფლობითი და ღიაა იმ არასამთავრობო ორგანიზაციებისთვის, რომლებიც იზიარებენ დოკუმენტში აღიარებულ პრინციპებსა და ვალდებულებებს. აქვე უნდა აღინიშნოს, რომ უკვე მრავალი წელია, IDFI პროაქტიულ რეჟიმში აქვეყნებს ზემოდ აღნიშნულ ინფორმაციას და ამიტომ იგი, წელს უკვე მეორედ დასახელდა (ექვს ქართულ არასამთავრობო ორგანიზაციასთან ერთად) მსოფლიოს მასშტაბით ფინანსურად ყველაზე გამჭვირვალე ანალიტიკურ ორგანიზაციად (ამ შეფასებითი კვლევის ავტორია ორგანიზაცია Transparify, რომელიც უკვე მესამე წელია აქვეყნებს შედეგების შემცველ ანგარიშებს).

ინფორმაცია რეგულარულად განთავსდება სამოქალაქო ორგანიზაციების ახალ ვებპორტალზე - www.cso.ge, რომლის პრეზენტაციაც დეკლარაციის ხელმოწერის შემდგომ გაიმართა.

პრეზენტაციის დასასრულს, თბილისსა და რეგიონებში მომუშავე 60-მდე ორგანიზაციამ მათი საქმიანობის ამსახველი ფოტოგამოფენა მოაწყო. ამავდროულად მათ საზოგადოებას და მედიას საკუთარ საქმიანობა გააცნეს.

ღონისძიება ორგანიზებული იყო „სამოქალაქო განვითარების სააგენტოსა“ (სიდა) და „სამოქალაქო საზოგადოების რეგიონული ქსელის“ (R-CSN) მიერ, აღმოსავლეთ-დასავლეთის მართვის ინსტიტუტის (EWMI) ACCESS პროგრამის მხარდაჭერით, რომელსაც აფინანსებს აშშ საერთაშორისო განვითარების სააგენტო (USAID).

გამჭვირვალობის დეკლარაციაზე ხელმომწერი ორგანიზაციები:

1. სამოქალაქო განვითარების სააგენტო (სიდა)2. სამართლიანი არჩევნებისა და დემოკრატიის საერთაშორისო საზოგადოება (ISFED)

3. საერთაშორისო გამჭვირვალობა - საქართველო

4. ადამიანის უფლებების სწავლებისა და მონიტორინგის ცენტრი (EMC)

5. განვითარებისა და დემოკრატიის ცენტრი (CDD)

6. ინფორმაციის თავისუფლების განვითარების ინსტიტუტი (IDFI)

7. საქველმოქმედო ჰუმანიტარული ცენტრი "აფხაზეთი"

8. ააიპ ასოციაცია "ათინათი"

9. დემოკრატიის ინსტიტუტი

10. დემოკრატ მესხთა კავშირი/UDM

11. მედიის განვითარების ფონდი

12. ქუთაისის განათლების განვითარების და დასაქმების ცენტრი

13. საქართველოს დემოკრატიული განვითარების კავშირი

14. კონსტიტუციის 42-ე მუხლი

15. რეგიონის განვითარების ცენტრი

16. ადამიანის უფლებათა ცენტრი

17. არასამთავრობო ორგანიზაცია "საქართველოს დემოკრატიული ინიციატივა"

18. წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრი - GCRT