ვენეციის კომისიამ საქართველოს მოუწოდა უარი თქვას ოლიგარქიულ გავლენებთან ბრძოლის პერსონიფიცირებულ მიდგომაზე - სპეციალურ კანონზე. ვენეციის კომისიის მითითებით, პარადოქსია, “დეოლიგარქიზაციის” კანონის აღსრულება მოსთხოვო ინსტიტუტებს, რომლებშიც, როგორც ჩანს, ოლიგარქიულ გავლენებს ფესვები აქვს გადგმული.
ვენეციის კომისიის მოსაზრებით, „ოლიგარქიზაციის“ პრობლემის კომპლექსურობიდან გამომდინარე, აუცილებელია, რომ თითოეულმა სახელმწიფომ თავისი ისტორიული, სამართლებრივი და პოლიტიკური კონტექსტის გააზრებით განსაზღვროს ოლიგარქიულ გავლენებთან ბრძოლის მეთოდები.
ამ ფონზე, “ოლიგარქიზაციასთან” ბრძოლის სპეციალური კანონის მიღების ნაცვლად, ვენეციის კომისიამ საქართველოს მოუწოდა გაატაროს სათანადო რეფორმებიმოქმედი კანონმდებლობის აღსასრულებლად და დემოკრატიული ინსტიტუტების დამოუკიდებლობისა და ეფექტურობის უზრუნველსაყოფად. ამ თვალსაზრისით, ვენეციის კომისიამ განსაკუთრებული ყურადღება გაამახვილა მართლმსაჯულების სექტორზე. ვენეციის კომისიის მითითებით, რეფორმები უნდა იყოს სისტემური, ყოვლისმომცველი და შეუქცევადი/ინტენსიური (“relentless”).
აღსანიშნავია, რომ ამ თვალსაზრისით ვენეციის კომისიამ გაიზიარა სამოქალაქო ორგანზაციების პოზიცია ევროკავშირის 12 პუნქტის შესრულებასთან დაკავშირებით. ჩვენი პოზიციით, ევროკავშირის სხვა რეკომენდაციების რეალური იმპლემენტაცია, თავისთავად, გადაჭრიდა “დეოლიგარქიზაციის” პრობლემას, ვინაიდან ძლიერ და რეალურად დამოუკიდებელ სახელმწიფო ინსტიტუტებში ოლიგარქიული გავლენებისთვის სივრცე არ რჩება.
ვენეციის კომისიის ამ დასკვნით მნიშვნელოვნად გაიზარდა სახელმწიფო ინსტიტუტების რეფორმირების საჭიროება მათი რეალური დამოუკიდებლობის, ეფექტურობის, კოორდინაციისა და ანგარიშვალდებულების თვალსაზრისით.
ვენეციის კომისიის კრიტიკული დასკვნის მიუხედავად საქართველოს პარლამენტმა მეორე მოსმენით დაუჭირა მხარი “დეოლიგარქიზაციის შესახებ” კანონს. მნიშვნელოვანია აღინიშნოს, რომ მმართველი პარტიის არგუმენტი ვენეციის კომისიის დასკვნისა და ევროკავშირის მოთხოვნების ურთიერთწინააღმდეგობის თაობაზე სიმართლისგან შორს დგას. აღნიშნულს ადასტურებს საქართველოში ევროკავშირის წარმომადგენლობის განცხადება. ამდენად, საქართველოს მიერ ვენეციის კომისიის დასკვნის გაუთვალისწინებლობას და კანონის არსებული ფორმით მიღებას ნეგატიური გავლენა ექნება სახელმწიფოს ევროპული ინტეგრაციის პროცესზე.
IDFI-მ აკაკი ჩხენკელის სახელობის ხონის მეორე საჯარო სკოლაში მოსწავლეებთან შეხვედრა გამართა
01.12.2023მუნიციპალიტეტების წარმომადგენლობითი ხარჯები
27.11.2023
სიახლეების გამოწერა
