გაეროს საერთაშორისო სატელეკომუნიკაციო კავშირის - ITU-ის ინფორმაციით, ინტერნეტი საქართველოს მოსახლეობის 45%-სთვისაა ხელმისაწვდომი.
IDFI-იმ საქართველოს კომუნიკაციის ეროვნული კომისიიდან საქართველოს რეგიონების მიხედვით, 2013 წლის მონაცემები, სხვადასხვა ინტერნეტმომსახურების მიხედვით გამოითხოვა.
სადენიანი ინტერნეტის მოხმარების მხრივ, მიღებული ინფორმაციიდან ირკვევა, რომ 2010 წლიდან მდგომარეობა ყოველწლიურად უმჯობესდება: თუ 2010 წელს ინტერნეტს ამ საშუალებით 252 131 აბონენტი იღებდა, 2013 წლის ოქტომბრისთვის მათი ოდენობა 434 969-ს უტოლდება. მზარდი მაჩვენებლების მიუხედავად, გრაფიკიდან ჩანს, რომ ბოლო ორ წელიწადში (2012-2013) სადენიანი ინტერნეტის ბაზარი კარდინალურ ცვლილებებს არ განიცდის.
რეგიონებს რაც შეეხება, მოწოდებული მონაცემებიდან ჩანს, რომ სადენიანი ინტერნეტის აბონენტების რაოდენობით თბილისის შემდგომ (273 396) მეორე ადგილზე არის იმერეთის რეგიონი – 42 198 აბონენტი: “მონაცემები, სამწუხაროდ, საქართველოში სადენიანი ინტერნეტის არათანაბარ ხელმისაწვდომობას ადასტურებს, განსაკუთრებით რეგიონებში”.
მონაცემების მიხედვით, რეგიონებიდან სადენიანი ინტერნეტი ყველაზე ნაკლებად ხელმისაწვდომია რაჭა-ლეჩხუმში და ქვემო სვანეთში, გურიასა და მცხეთა მთიანეთში – საერთო ჯამში, 2013 წლის ოქტომბრისთვის, ამ სამ რეგიონში სულ 4 928 სადენიანი ინტერნეტ აბონენტია დაფიქსირებული.
სიახლეების გამოწერა
