ა(ა)იპ „ინფორმაციის თავისუფლების განვითარების ინსტიტუტი“ - IDFI 2012 წლის დეკემბრიდან ჩართულია საქართველოს ანალოგური მაუწყებლობიდან ციფრულ საეთერო მაუწყებლობაზე გადასვლის პროცესის მხარდაჭერის და ადვოკატირების პროცესში. აქტივობებს ახორციელებს პროექტის „ციფრულ საეთერო მაუწყებლობაზე გადასვლის პროცესის მხარდაჭერა და მონიტორინგი საქართველოში“ ფარგლებში ფონდ „ღია საზოგადოება საქართველოს“ ფინანსური მხარდაჭერით.

ციფრულ მაუწყებლობაზე გადასვლის პროცესის მონიტორინგი და მხარდაჭერა IDFI-იმ დაასრულა 2016 წლის დასაწყისში. სხვადასხვა ორგანიზაციების და პროცესზე პასუხისმგებელი უწყებების შეფასებით, წარმატებული და დემოკრატიულ ღირებულებებზე მორგებული მოდელის დანერგვის საქმეში ჩვენი ორგანიზაციის წვლილი საკმაოდ დიდია. მიუხედავად რიგი საკითხების მიმართ სახელმწიფოს მხრიდან ნაკლები ყურადღებისა, მთლიანობაში ეს პროცესი წარმატებულად და მედია ბაზრის მთავარი მოქმედი პირების - მაუწყებლების და მომხმარებლების ინტერესების შესაბამისად წარიმართა.

,,ციფრულ მაუწყებლობაზე გადასვლის ქართული მოდელი” - ასე უწოდეს ციფრულ მაუწყებლობაზე გადასვლის პროცესს 2015 წლის ეუთოს ყოველწლიურ სამხრეთ კავკასიის მედია კონფერენციაზე, რომლის ერთ-ერთი მთავარი თემა ანალოგურიდან ციფრულ მაუწყებლობაზე გადასვლის პროცესი იყო. კონფერენციაზე, რომელშიც რეგიონის ყველა სახელმწიფოს წარმომადგენელი მონაწილეობდა, მკაფიოდ აღინიშნა, რომ კავკასიის რეგიონში მხოლოდ საქართველომ შეძლო წარმატებით გამოერთო ანალოგური მაუწყებლობა და შეექმნა ციფრული სამაუწყებლო სისტემის საკუთარი მოდელი, რის მიღწევაც უმეტესად პროცესში სამოქალაქო საზოგადოების ჩართულობით გახდა შესაძლებელი.

მიუხედავად ეროვნული დაფარვის მულტიპლექსების მუშაობისას გარკვეული მცირედი ხარვეზების და რეგიონული მულტილპექს პლატფორმების წინაშე არსებული ბიზნეს მდგრადობის პრობლემებისა, მთლიანობაში, დღეის მდგომარეობით, ციფრული საეთერო მაუწყებლობის სისტემაში საქართველოში სახეზე გვაქვს 17 მცირე რეგიონული, 2 კერძო ეროვნული დაფარვის და ერთი სახელმწიფოს წილობრივი მონაწილეობით მოქმედი ეროვნული ციფრული ქსელი, რაც ერთ კონკრეტულ დასახლებულ წერტილში, მინიმუმ 20 და მაქსიმუმ 60 არხის მაყურებლისთვის უფასოდ ყურების შესაძლებლობას იძლევა მაშინ, როცა ანალოგური სისტემის შემთხვევაში ერთ ლოკალურ ტერიტორიაზე უფასოდ მხოლოდ 10-მდე არხის მიღება ხერხდებოდა და ისიც ხშირ შემთხვევაში ძალიან ცუდი ხარისხით.

IDFI-ის ანგარიში საქართველოს ციფრულ მაუწყებლობაზე გადასვლის შესახებ

/public/upload/IDFI/IDFI/Geo_idfi-report-on-digital-switchover-in-georgia.pdf