2013 წლის 2 აპრილს „ინფორმაციის თავისუფლების განვითარების ინსტიტუტმა“ დისკუსია გამართა საჯარო დაწესებულებების საზოგადოებასთან ურთიერთობის სამსახურების  წარმომადგენლებთან.

შეხვედრაზე, რომელიც პროექტის „ელექტრონული ჩართულობის განვითარება საქართველოში“ ფარგლებში მოეწყო,  განხილულ იქნა საჯარო დაწესებულებების ელექტრონული საკომუნიკაციო პლატფორმების ეფექტურობის საკითხი.

IDFI -მ წარმოადგინა კვლევები სამთავრობო უწყებების ვებგვერდებზე არსებული საკომუნიკაციო მექანიზმებისა და მოქალაქეებთან ურთიერთობის სტრატეგიის შესახებ.

IDFI -მ 23 საჯარო დაწესებულების მათ შორის პარლამენტის, პრეზიდენტის ადმინისტრაციის, ცესკოს, სახელმწიფო აუდიტისა და თბილისის მერიის ვებ-გვერდებზე არსებული ელ - მონაწილეობის საშუალებების მინიტორინგი ჩაატარა.

 ვებ-გვერდები ელ-მმართველობის საერთაშორისო კრიტერიუმების მიხედვით შეფასდა: მომხმარებლის მუდმივი ინფორმირება, ინტერაქციული მექანიზმების არსებობა ვებ-გვერდებზე, რომლებიც მოქალაქეებს უწყებასთან კავშირს და საკუთარი აზრის გამოხატვას უადვილებს და გადაწყვეტილების მიღების პროვესში საზოგადოების უშუალო მონაწილეობას უზრუნველყოფს.
 
კვლევის შედეგად გამოვლინდა, რომ საჯარო დაწესებულებებსა და მოქალაქეებს შორის კომუნიკაცია ცალმხრივია. ვებ-გვერდებზე არ არის გათვალისწინებული შესაბამისი სერვისები შეზღუდული შესაძლებლობების მქონე პირებისთვის.

სახელმწიფო დაწესებულების უმეტესობა ამ ეტაპზე საკუთარი ვებ-რესურსების განვითარებაზე მუშაობს, შეხვედრაზე საჯარო დაწესებულებების წარმომადგენლებმა აღნიშნეს, რომ ინსტიტუტის რეკომენდაციები ხელს შეუწყობს მათი ოფიციალური ვებ-გვერდების ინფორმაციული და  საკომუნიკაციო მექანიზმების დახვეწას. ბევრმა მათგანმა გამოთქვა სურვილი და მზადყოფნა IDFI-სთან მოქალაქეებთან სატელეფონო და პირისპირ კომუნიკაციის სერვისების გაუმჯობესების საკითხებზეც ითანამშრომლონ.

პროექტი ხორციელდება აღმოსავლეთ-დასავლეთის მართვის ინსტიტუტის (EWMI) მხარაჭერით, პროგრამის - „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების“ (G-PAC) - ფარგლებში.