მიმდინარე წლის 7 მარტს, საქართველოს პრემიერ მინისტრთან ეკონომიკისა და მდგრადი განვითარების სამინისტროს მიერ წარმოდგენილი იყო საქართველოს ციფრულ საეთერო მაუწყებლობაზე გადასვლის პოლიტიკის ორიენტირები და საკითხის ხედვა.

შეხვედრას ესწრებოდნენ სამინისტროების, მაუწყებლების და არასამთავრობო ორგანიზაციების წარმომადგენლები. შეხვედრას ესწრებოდა IDFI-ის ექსპერტი უჩა სეთური, რომელიც ხელმძღვანელობს საქართველოს ეკონომიკისა და მდგრადი განვითარების სამინსიტროსთან შექმნილ ციფრულ მაუწყებლობაზე გადასვლის საბჭოს სოციალურ საკითხებზე მომუშავე ქვეჯგუფს. წარმოდგენილი პრეზენტაციის ფარგლებში შემოთავაზებულია საინტერესო ბიზნესმოდელი, რომლის შესაბამისად სახელმწიფოს მიერ მოხდება ციფრული საეთერო ქსელის დაფინანსება, რომლის მეშვეობით მოხდება როგორც საზოგადოებრივი არხების ტრანლსირება, ასევე კერძო საეთერო მაუწყებლების ტრანსლირება. აღნიშნული პროექტის შესაბამისად, გარდამავალ პერიოდში (2015 წლის 17ივნისი), არსებული კერძო მაუწყებლების ტრანლსირება მოხდება ნულოვანი ტარიფებით, რაც მათ მისცემს საშუალებას თავიდან აიცილონ ორმაგი ხარჯები (ხარჯები არსებული ანალოგური ტრანსლირებისათვის, ასევე ციფრული ტრანსლირებისათვის). წარმოდგენილ მოდელში განსაკუთრებით საინტერესოა მცირებიუჯეტიანი, ადგილობრივი და რეგიონული მაუწყებლებისათვის, რომლებიც პოლარიზებული სარეკლამო ბაზრის გამო, ისევე როგორც სხვა მიზეზების გამო, ამ დახმარების გარეშე, საკმაოდ მძიმე მდგომარეობაში აღმოჩნდებოდნენ.

დადებითად უნდა  შეფასდეს დაბალი შემოსავლების ბოლო მომხმარებლების სუბსიდირების პოლიტიკა, რომელიც საჭირო აპარატურის უსასყიდლოდ გადაცემის
გარდა, გარკვეული კატეგორიის მომხმარებლებისათვის საინსტალაციო მომსახურებასაც ითვალისწინებს. პროექტის შესაბამის დონეზე რეალიზაციისათვის ასევე დაგეგმილია შესაბამისი საინფორმაციო კამპანიის დაფინანსებაც.

შეხვედრაზე IDFI-ის ექსპერტმა უჩა სეთურმა წარმოადგინა ინსტიტუტის ხედვები აღნიშნულ საკითხთან დაკავშირებით კერძოდ მოსაზრებები შემოთავაზებულ ბიზნესმოდელზე, ლიცენზირების საკითხებზე და ციფრულ მაუწყებლობაზე გადასვლის პროცესში კონკურენციის უზრუნველყოფაზე.ორგანიზაციამ უკვე გამოქვეყნა და რამდენიმე მნიშვნელოვანი კვლევა ციფრულ საეთერო მაუწყებლობაზე გადასვლასთან დაკავშირებით და ამჟამად პროექტის „ციფრულ მაუწყებლობაზე გადასვლის პროცესის მხარდაჭერა და მონიტორინგი საქართველოში“, რომელიც ფინანსდება ფონდ „ღია საზოგაოდოება საქართველოს“ მიერ, მუშაობს ციფრულ საეთერო მაუწყებლობაზე გადასვლის სტრატეგიის სოციალურ საკითხებზე, ისევე როგორც პოლიტიკის სხვა მიმართულებებზე.

 იხილეთ IDFI-ის კვლევები:

„ინფორმაციის თავისუფლების განვითარების ინსტიტუტის (IDFI)“ წინადადებები ციფრული საეთერო მაუწყებლობის პოლიტიკის შესახებ

რეკომენდაციები "ციფრული მაუწყებლობის დახმარების სახელმწიფო სტრატეგიის განსაზრვრისათვის"

საქართველოს ციფრულ საეთერო მაუწყებლობაზე გადასვლის პროცესის სახელმწიფო  სუბსიდირების პოლიტიკის ორიენტირები  და ბენეფიციარები