„ინფორმაციის თავისუფლების განვითარების ინსტიტუტმა“ (IDFI), როგორც ღია მმართველობის უწყებათოშორისი საკოორდინაციო საბჭოს წევრმა, საქართველოს ღია მმართველობის უწყებათაშორისი საკოორდინაციო საბჭოს სამდივნოს, სამოქალაქო საზოგადოების სხვა წარმომადგენლებთან ერთად, წარუდგინა ვალდებულებები, რომლებიც განსახილველად გაეგზავნათ საბჭოში შემავალ სახელმწიფო უწყებებს.
IDFI-ის მიერ წარმოდგენილი ვალდებულებები დაფუძნებულია საუკეთესო საერთაშორისო პრაქტიკაზე, მათ შორის OGP-ის წევრი სახელმწიფოების მიერ აღებულ ვალდებულებებზე და მიზნად ისახავს საქართველოში მოქალაქეთა ჩართულობისა და კანონის უზენაესობის გაძლიერებას, მონაცემებზე წვდომის და ინფორმაციის თავისუფლების გაზრდას, კორუფციასთან ბრძოლას და სახელმწიფო უწყებების მეტი გამჭვირვალობის ხელშეწყობას. აღსანიშნავია, რომ სამოქალაქო სექტორის მიერ წარდგენილი სამი ვარსკვლავური ვალდებულებიდან ორი იყო IDFI-ის მიერ ინიციირებული, კერძოდ, მოპოვებითი მრეწველობის გამჭვირვალობის ინიციატივის (EITI)სტანდარტების დანერგვა და საზღვარგარეთ რეგისტრირებული კომპანიების ბენეფიციარი მესაკუთრეების რეესტრის შექმნა. ორივე დასახელებული ინიციატივის გათვალისწინება ძალიან მნიშვნელოვანი ნაბიჯი იქნება საბჭოს მხრიდან გამჭვირვალობის ხელშეწყობის, გარემოს დაცვის, ინვესტიციების წახალისებისა და მუნიციპალიტეტებში მცხოვრები მოსახლეობის დაცვის მიზნით.
IDFI რჩება ღია მმართველობის პარტნიორობის მიმართულებით ლიდერ არასამთავრობო ორგანიზაციად საქართველოში.
მოცემული მასალის მომზადება დაფინანსებულია შვედეთის საერთაშორისო განვითარების თანამშრომლობის სააგენტოს, Sida-ს მიერ. შინაარსზე პასუხისმგებლობა სრულად ეკისრება მის შემქმნელს. Sida შესაძლოა არ იზიარებდეს გამოთქმულ ხედვებსა და ინტერპრეტაციებს.
სიახლეების გამოწერა
