ხვალ, 1 აპრილს, ღია მმართველობის პარტნიორობა (OGP) გამართავს გასაუბრებების ბოლო შესარჩევ ეტაპს სადაც მონაწილეობას მიიღებს OGP-ის მმართველ კომიტეტში (Steering Committee) შესარჩევი კონკურსის მონაწილე 16 ნახევარფინალისტი. საერთაშორისო კონკურსის ნახევარფინალში 47 კანდიდატიდან მხოლოდ 16 ადამიანი იქნა შერჩეული, მათ შორის ინფორმაციის თავისუფლების განვითარების ინტიტუტის (IDFI) დირექტორი გიორგი კლდიაშვილი. საბოლოოდ OGP-ის მმართველი კომიტეტის წევრი მხოლოდ 6 არასამთავრობო ორგანიზაციის წარმომადგენელი გახდება.

ინტერნეტ კონფერენციაში მონაწილეობის მიღება შეუძლია ნებისმიერ მსურველს შემდეგ ბმულზე დარეგისტრირების შედეგად. ინტერნეტ-კონფერენციის მეშვეობით მონაწილეებს საშუალება ექნებათ მოუსმინონ ნახევარფინალისტებს, გაიგონ მათი ხედვა ღია მმართველობის პარტნიორობაზე და მიწერონ კითხვები, რომელსაც კანდიდატები უპასუხებენ.

კომიტეტი ღია მმართველობის პარტნიორობის (OGP) აღმასრულებელი, გადაწყვეტილების მიმღები ორგანოა და მისი მთავარი მისიაა ღია მმართველობის პარტნიორობის პრინციპების დაცვა და გავრცელებაა. მმართველი კომიტეტი პასუხისმგებელია ღია მმართველობის პარტნიორობის საქმიანობის მეთვალყურეობაზე, პოლიტიკისა და თანამშრომლობის წესების განსაზღვრაზე. კომიტეტი 22 წევრისგან შედგება - 11 მთავრობისა და 11 სამოქალაქო საზოგადოების წარმომადგენლებისგან. წევრები კომიტეტში სამი წლით აირჩევიან, ვადის 1 წლით გახანგრძლივების პერსპექტივით.

გიორგი კლდიაშვილი საქართველოს ღია მმართველობის პარტნიორობასთან მიერთების დღიდან აქტიურად არის ჩართული OGP-სთან დაკავშირებულ სხვადასხვა საერთაშორისო, რეგიონულ თუ ადგილობრივ კონფერენციებსა და სამუშაო შეხვედრებში და არის OGP-ის საქართველოს ფორუმის (Open Government Georgia Forum ) თანათავმჯდომარე და საქართველოს ღია და მუდმივმოქმედი საპარლამენტო საბჭოსთან არსებული საკონსულტაციო საბჭოს თავმჯდომარე ორგანიზაციის - IDFI - დირექტორი.

ღია მმართველობის პარტნიორობა (OGP), რომელიც მსოფლიოს მასშტაბით ხელისუფლების გამჭვირვალობასა და ანგარიშვალდებულების გაზრდას ისახავს მიზნად 69 სახელმწიფოს აერთიანებს.