2024 წლის 10 დეკემბერს, თბილისის საქალაქო სასამართლოში, IDFI-ის კანონის უზენაესობისა და მედიის თავისუფლების მიმართულების ხელმძღვანელის, გიორგი დავითურის, წინააღმდეგ მიმდინარე სამართალდარღვევის საქმის განხილვა დასრულდა. მოსამართლე ლელა მილდენბერგერმა გიორგი დავითური, შესაბამისი მტკიცებულებების არარსებობის მიუხედავად, სამართალდამრღვევად ცნო და სახდელის სახით 2200 ლარის ოდენობის ჯარიმა დააკისრა.
გიორგი დავითური 2024 წლის 2 დეკემბერს, გამთენიისას, სპეცრაზმის მიერ რუსთაველის გამზირზე მიმდინარე შეკრების დარბევისას და მშვიდობიანი დემონსტრანტების ალყაში მოქცევისას, უსაფუძვლოდ და უკანონოდ დააკავეს.
გიორგი დავითურისა და მისი ადვოკატის მიერ, სასამართლოს წინაშე წარდგენილ იქნა არაერთი მტკიცებულება, რომელიც ადასტურებდა, რომ გიორგი დავითურს არ ჩაუდენია ადმინისტრაციული სამართალდარღვევა, ის პროტესტს გამოხატავდა მშვიდობიანი ფორმით და დაკავების მომენტში გადაადგილდებოდა რუსთაველის მეტროს მიმართულებით. ამ მტკიცებულებების საფუძველზე, სასამართლოს წინაშე გაცხადებულ იქნა შუამდგომლობა სამართალდარღვევის საქმის წარმოების შეწყვეტის თაობაზე, რომელიც არ დაკმაყოფილდა.
შინაგან საქმეთა სამინისტრო გიორგი დავითურს ედავებოდა “წვრილმანი ხულიგნობისა” და “პოლიციელის კანონიერი მოთხოვნისადმი დაუმორჩილებლობის” ჩადენას, თუმცა სამინისტროს წარმომადგენელს სასამართლოს წინაშე არ წარმოუდგენია, ერთი მტკიცებულებაც კი, რომელიც გიორგი დავითურის მიერ სამართალდარღვევის ჩადენის თაობაზე შექმნიდა საფუძვლიან და დასაბუთებულ ვარაუდს. ნაცვლად ამისა, შინაგან საქმეთა სამინისტრომ მოწმის სახით მოიწვია მხოლოდ ორი პოლიციელი. აქვე უნდა აღინიშნოს, რომ სასამართლოში წარმოდგენილი დაკავების ოქმი, შეტყობინების რეგისტრაციის დოკუმენტი და სამართალდარღვევის ოქმი ზოგად და ერთმანეთთან შეუსაბამო ინფორმაციას შეიცავს.
მნიშვნელოვანია აღინიშნოს, რომ 28 ნოემბრის შემდგომ განხორციელებული სისტემური რეპრესიების ფარგლებში, სასამართლო საქმეებს სამართლიანი სასამართლოს უფლების არსებითი დარღვევით განიხილავს.
საქმის ფაქტობრივი გარემოებებიდან გამომდინარე, პირველი ინსტანციის სასამართლოს გადაწყვეტილებას გიორგი დავითურის სამართალდამრღვევად ცნობის თაობაზე არ ვეთანხმებით და ვგეგმავთ გამოვიყენოთ ყველა შესაძლო მექანიზმი, დამდგარი შედეგის საპასუხოდ.
სიახლეების გამოწერა
